Awe ta dicidi si ta prolonga detencion di Jason M pa a tene relacion sexual cu menor di edad

ORANJESTAD – Despues di a pasa e proceso inicial di interogacion, e sospechoso Jason M. (39) a keda encarcela (in verzekering gesteld) diahuebs atardi. E ta oficialmente sospecha di abuso sexual cu un menor (artikel 2:200 y 2:203 di nos codigo penal), concretamente segun vocero di ministerio publico Ann Angela, ‘A tene relacion sexual cu un menor di edad’. Durante un entrada hudicial diahuebs mainta, a confisca varios artefacto di M, y a pasa pa detene pa interogue. Esey a tuma su tempo reglamentario pa despues na final di dia, pasa pa encarcele pendiente su presentacion dilanti Huez Comisario awe. Awe e Huez Comisario  lo dicidi si ta prolonga e detencion den cuadro di e investigacion cu 8 dia mas.