DVG: Cantidad di registro pa vacuna contra Covid19 ta aumentando

ORANJESTAD – E cantidad di persona cu a ricibi nan vacuna pa Covid19 na Aruba, poco poco ta aumentando. Segun cifranan divulga diabierna mainta pa Departamento di Salud (DVG), un total di 3892 persona a vacuna caba, mientras cu 19949 a registra pa ricibi e vacuna. Pues den un siman y dos dia, casi 4000 persona a ricibi nan vacuna caba. Loke ta importante ta e cifra di esnan vulnerable manera esnan cu ta cay den e categoria 60+. 

AUMENTO 60+

E positivo ta cu for di dialuna, unda cu e registro tabata apenas na 5000 hende registra, a aumenta te na 8822 persona, mientras cu 2793 persona di 60+ a vacuna caba. A spera cu e cifra di 5 mil lo a aumenta despues cu tres minister di e gabinete Wever Croes a vacuna dialuna ultimo. Tabata un dia despues cu gobierno a anuncia cu 4 mil persona extra a registra despues di nan acto di vacuna. Ta spera cu e cantidad sigui subi. A mustra cu dialuna awor ta inicia e di tres proceso unda cu lo activa tur 4 localidad di vacuna, unda cu ta spera cu por vacuna por lo menos 800 pa 1000 persona pa dia.