Van Zwol a bolbe Hulanda sin acuerdo cu gobierno di Aruba

ORANJESTAD /DEN HAAG - Secretario-General di ministerio di Asuntonan Interno di Hulanda y Relacionnan di Reino Richard van Zwol a bolbe Hulanda e siman aki, man bashi. Bashi den e sentido cu no a logra yega na un acuerdo cu gobierno di Aruba riba finanzas publico. NoticiaCla.com a compronde cu e agenda cu tabata pa trata e presupuesto 2015 y implementacion di College Financieel Toezicht, a bira un reunion unda cu a solamente papia riba ‘crecemento economico y maneho financiero’. Esaki mientras cu e intencion tabata pa partidonan haya otro formalmente riba con ta fiha e trayecto Hulanda a bisa cu nan lo ‘sinta warda kico gobierno ta haci cu e presupuesto 2015 y kico finalmente nan ta entrega na gobernador'. Un punto positivo di e bishita ta cu van Zwol lo tin un bon impresion di e minister di Finanza Angel Bermudez y tin confiansa cu e lo por resolve tur 'asunto pendiente'. Mescos ta e caso cu e minister plenipotenciario di Aruba na Hulanda, Alfonso Boekhoudt, pa loke ta e relacion cu e super ambtenaar. 

Manera cu NoticiaCla.com a raporta awe mainta caba, for di diadomingo caba van Zwol a yega Aruba pa un serie di reunionnan importante. Van Zwol a bin Aruba hunto cu e director general pa presupuesto gubernamental di ministerio hulandes di finanza, y Kees van Nieuwamerongen di College Financieel Toezicht.

Ultimo biaha cu e tabata na Aruba, cos no a bay mucho bon, unda cu e la te hasta opta pa cancela tur reunion cu fraccionnan politico di nos isla. No ta conoci e biaha aki si e lo topa cu e fraccionnan e biaha aki. Ta conoci cu tanto prome minister Eman como vice prome minister Mike de Meza ta den exterior, y como tal nan lo no topa cune. Den e caso aki, ta keda Benny Sevinger aunke cu tin informacion cu e lo papia mas sigur cu cierto departamentonan y tambe minister di finanza Angel Bermudez. Bermudez a confirma na NoticiaCla.com siman pasa cu e siman aki probablemente lo por keda cla cu e concepto di presupuesto 2015, pa despues entrege atrobe na gobernador pa e por cuminsa cana su caminda. Problema segun Bermudez, ta cu tin hopi minister den exterior y mester a haya nan pa firma e presupuesto. Siman pasa tabatin como 4 afo segun e mandatario, y ayera otro 2 a biaha atrobe. Mientrastanto e otronan a bolbe Aruba.

Pa loke ta van Zwol, tin disputa riba su ‘importancia’ den gobierno Hulandes y si enberdad e ta un ‘super ambtenaar’. Algun a indica cu e ta un ‘simpel’ ambtenaar aunke cu e funcion di ambtenaar mas halto den rango. NoticiaCla.com a confirma cu den practica, van Zwol tin te hasta ‘mas poder’ cu su hefe, Ronald Plasterk y cu e tin un ‘liña directo’ cu prome minister Mark Rutte. Pues ora cu van Zwol papia, hende ta scucha y cosnan ta sosode, mas liher cu ora cu ta trata Plasterk. Esey ta pone cu cada bez cu e ta na Aruba, cosnan ta sosode riba e tereno politico cu ta hala atencion.