Parlamento lo trata ley di Codigo Civil nobo cu ta contene e.o. union civil, otro siman!

ORANJESTAD – Despues di hopi bay bin, Parlamento a pone fecha porfin pa trata e ley di introduccion pa e cambionan cu Parlamento aproba na 2016 cu ta inclui partinan nobo den Buki 1 (derecho personal y familiar), Buki 3 (derecho di propiedad), Buki 4 (derecho di herencia) y Buki 7 (acuerdonan special) di nos Codigo Civil, y e punto mas controversial, e registracion di union civil, mas concreto registracion di parehanan di mesun sexo den un union civil.

POSPONE

Ora cu recientemente a bira conoci cu Parlamento a pospone e tratamento di e ley aki ‘te proximo aviso’, esaki a causa un ola di reaccion di gruponan cu ta sostene union civil pa parehanan di mesun sexo. Pero awor ta mustra cu e ley lo keda trata riba dialuna 1 di maart proximo. Fuera di e parti di registracion di union civil, tin un cantidad di otro asunto cu tambe lo conoce cambio cu tambe ta na beneficio di comunidad, manera: reglanan nobo pa seleccion di fam, derecho di propiedad matrimonial, derecho di huur, contratonan laboral, determinacion hudicial di paternidad y e reglanan nobo na ora di reconoce un yiu.