Bermudez: Concepto di presupuesto 2015 a keda entrega

ORANJESTAD – E concepto di presupuesto 2015 a wordo entrega na Gobernador dialuna ultimo. Esaki a keda confirma pa minister di finanza Angel Bermudez na NoticiaCla.com awe merdia“. Awor e ta canando su caminda cu ta entre otro Gobernador, cu na su turno tin cu pasa esaki pa Raad van Advies y despues e ta bay Parlamento. Pero no tin fecha ainda pa trata esaki den un reunion publico. Informacionnan cu NoticiaCla.com tin ta cu e lo a bay te hasta Raad van Advies caba.

PRESIDENTE PARLAMENTO

Den combersacion cu presidente di parlamento Marisol Lopez Tromp recientemente, e la confirma na NoticiaCla.com cu lo trata e presupuesto pronto, aunke cu e prome presupuesto cu ta wordo trata, ta esun di Parlamento mes. “Staten su presupuesto pa 2015 ta bay prome, despues sigui pa e otro presupuestonan di e hoge collegesnan manera p.e. Rekenkamer”. Despues ta bin esun di land Aruba.

FIHA FECHA PA TRATAMENTO

Unabes cu e presupuesto di pais Aruba drenta, ta stipula un fecha fiho. “Berdad cu tin un planning pero e planning ta depende di ora cu e documentonan drenta. Si mi a fiha un fecha mes y e leynan no a drenta, bo no por trate” Lopez a sigui bisa. Como tal no tin un fecha exacto pa trata e presupuesto. Tin uno tentativo, pero realidad di bida ta cu bo por trata e ley solamente ora cu e ley drenta Parlamento y tur miembro ricibi esaki. “Bo por haya cu e miembronan ta pidi cu nan kier mas tempo pa studia e documento, nan kier invita instancia, papia cu comisionnan fiho etc”. Pues tin hopi cos cu tin cu tuma lugar ainda prome cu e tratamento di presupuesto por tuma lugar.

STATEN

Pa loke ta e presupuesto di Staten, Lopez a confirma cu a cuminsa trata esaki den comisionnan interno caba y ta trate pa fin di januari of inicio di februari aworaki. “Esun di gobierno, mi no por pone un fecha publico si ainda e no a drenta presupuesto”.