Quota Club cu siman cu pueblo di Aruba por hasi test di oido gratis

ORANJESTAD - The Specialists i Fundacion pa Esnan cu Problema di Oido (FEPO) conjuntamente cu Quota lo ofrece oportunidat pa hasi test di oido gratis un biaha mas. Tawata tin oportunidad pa hasi test aki durante Quota su “Siman di Kibra Silencio” September 2020. E tawata un exito y tawata tin hopi persona cu no a logra hasi uso di e oportunidad aki y pesey ta ofrece e oportunidad aki un biaha mas.

PROGRAMA DI CONCIENTISACION

E anja aki Quota no por a hasi e programa di concientisacion manera tabata e costumber  pa anjos durante e temporada di carnaval y nos ta masha agradicido cu The Specialists i FEPO ta cooperando cu nos pa cu e projecto aki pa nos por keda brinda e conscientisacion.  Nos ta keto bay pasando den un pandemia pero nos mester keda corda ariba cuido di nos oido. Lo tin test nan gratis durante e siman di 1 maart 2021 pa 5 maart 2021 na e sigiente localidatnan cu ta Fundacion pa Esnan cu Problema di Oido (FEPO), The Specialists Aruba ( antes Optica Oduber & Kan).

HACI CITA

Door di tur e protocolnan cu mester wordu tene cuenta cu nan lo no por test mes tanto persona cu ta acostumbra pa test.  Hasi bo cita mas pronto possibel y por favor atene na e ora dibo cita. Un remarca: Uso di mondkapje ta pa un persona cu deficiencia auditivo  nada facil. E personannan aki ta hasi “liplezen” dus nan ta wak bo den cara pa comprende kiko bo ta bisando nan, y awor esey no por.  Por favor si bo sa cu un personan tin deficiencia auditivo purba di tene distancia , papia mas slow, articula claramente, hisa volumen y cu sena comunica cune.