Wever: Despues cu ministernan a vacuna, 4 mil hende mas a registra pa vacuna

ORANJESTAD – Un total di 4 mil ciudadano di Aruba a registra despues cu tres minister di gabinete Wever Croes a vacuna dialuna atardi. Asina un comunicado di gobierno ta bisa diaranson atardi. Segun e comunicado, cifranan te cu diamars 23 di februari, ta indica un total di 17.157 persona registra di cual mas di 7 mil ta ciudadanonan di 60 aña pariba. Esey ta nifica cu desde dialuna pa awor, 2 mil persona extra di e grupo di 60+ a registra pasobra dialuna ainda a informa cu e cantidad registra tabata apenas 5 mil di e 17 mil cu ta existi. Segun e comunicado, ta e hecho cu e tres minister a vacuna, a convence otronan pa tambe hacie.

VACUNA MINISTER

Manera ta conoci, dialuna 22 di februari 2021, dilanti wowo di prensa y Live via television nacional, Prome Minister Evelyn Wever-Croes a tuma e vacuna contra Covid na Centro Deportivo Libertador Betico Croes. Hunto cu Prome Minister, Minister di Salubridad, Dangui Oduber y Minister di Finansa, Xiomara Maduro tambe a tuma e vacuna. 

WARDA PROME 

Manera cu e portal aki a raporta tambe anteriormente, Prome Minister a expresa cu su preferencia lo tawata pa warda riba su turno segun plan di vacunacion di DVG y e gruponan di enfoke. Sinembargo a evalua e cifranan di esnan cu a registra, especialmente e grupo di enfoke di 60 aña pariba. E percentahe di registracion di e grupo aki tawata hopi abou loke a pone Gobierno dicidi pa intensiva esfuersonan di conscientisacion. 

TRANSPARENTE

“Mi a tuma e vacuna na e forma mas transparente posibel, dilanti prensa y Live na television nacional pa asina trankilisa e critica y cuestionamento cu tabata tin ‘pakico Minpres no a tuma e vacuna ainda’. Ami a tuma e vacuna, abo ta cla pa tum’e?”.E mandataro a bisa. E mandatario a gradici tur cu a duna oido na gobierno pa vacuna.