Na maart post di ambulance ta muda pa e centro comercial Wayaka Falls

ORANJESTAD – Den luna di maart e servicio di ambulance di Aruba ta muda pa su localidad nobo cu ta den e centro comercial nobo Wayaka Falls. Recientemente despues di hopi deliberacion y reunion , Instituto Medico San Nicolas, a cera e contract di 2 aña cu Noord Villas N.V. (Wayaca Falls) na Wayaca. Lo adapta e localidad pa cumpli cu e necesidad nan di e personal di Ambulance.

ADAPTACION DI LOCALIDAD

Ta remarcable cu ta bira prome biaha cu e servicio di ambulance lo usa un facilidad completamente nobo. E ekipo di profesionalnan di servicio di Ambulance a adapta e diseño di e localidad y gerencia di Wayaca Falls lo hasi e cambio nan debidamente y den luna di maart lo entrega e localidad na ImSan. Ta bon pa remarca cu e accesibilidad di Wayaca Falls ta ta completamente adapta na e entrada y salida pa e caminda principal.

SERVICIO DI AMBULANCE

Servicio di Ambulance ta conta cu 11 vehiculonan 3 pa cada warda E paramedico nan ta duna asistencia medico ora tin accidente y tambe ta atende e problemanan psicosocial cu ta aumenta mas y mas riba nos isla. Cada ambulance ta sali cu un “Ambulance verpleegkundige” specialisa y un Ambulance chauffeur entrena, cu tin como tarea duna asistencia medico. Servicio di Ambulance ta existi na Aruba desde aña 1930, pero ta resorta bou di ImSan for di aña 2005. Nan ta 36 empleado bon prepara y educa dor di Ambulance Academie di Hardewijk-Hulanda. E ekipo tin un total di 11 ambulance y 2 bicicleta na nan disposicion. Ta opera for di 3 diferente centro, situa na Wayaca, na ImSan na San Nicolas y tambe na Schotlandstraat. Anualmente Servicio di Ambulance ta atende un averahe di 7500 yamada, di cual por lo menos 7000 ta resulta den un transporte.