Casonan di hospitalisacion pa Covid19 a bolbe subi y yega 27

ORANJESTAD – E cantidad di persona hospitalisa pa Covid19 a bolbe subi diaranson. Un dia despues cu e portal aki a raporta e aumento alermante di 8 pa 25 caso den apenas 5 dia, diaranson hospital a raporta un aumento cu 2 caso mas, pues e cantidad a bira 27. Y importante den esaki, ta cu e aumento den caso di ICU a aumenta cu 2 diamars, y awe 2 mas den e parti general. Motibo cu ta bolbe enfatisa riba e tema aki, ta pasobra ta riba e cifranan aki, Crisis Team ta basa nan decision si mester di mas medida of no. Y mirando cu e situacion ta aumentando, e por tin efecto riba e cantidad nobo aki. Dialuna ora cu gobierno a tene conferencia di prensa, e cantidad cu a referi na dje tabata subiendo pero tabata na 17. Ya awe e ta na 27 pues den apenas 3 dia esaki a subi cu 10 persona atrobe y unda cu cuido intensivo tambe a aumenta.

RAPORTAHE

Un dia prome, esta ayera, e portal aki a raporta cu e casonan di hospitalisacion pa Covid19 a conoce un aumento grandi atrobe den apenas 5 dia di tempo. Den apenas 5 dia, e cantidad di hende hospitalisa pa Covid19 a subi di 8 te na 25 segun e  conteo te cu ayera. Esaki tabata un aumento basta halto (17) , y esaki ta e cifra mas importante cu Crisis Team ta mira pa dicidi riba nan siguiente accionan pa cu medida. Segun e cifranan e momento ey tabatin 7 hende den cuido intensivo (esaki tabata 5 pa basta dia) y 18 den cuido regular ( e tabata apenas 4, 5 dia pasa esta 19 di februari 2021). Mester corda cu hunto cu e casonan di cuido intensivo, tin hopi morto ultimo tempo, unda cu esey ta pone e cifra di cuido intensivo tambe baha. E portal aki a compronde cu tabatin un grupo di persona den cuido intensivo, cu a mustra cu nan situacion no ta nada bon y cu ta teme cu nan lo sali di esey.

MORTO

Pa loke ta morto, esaki tambe tabata preoccupante, unda cu den 23 dia di februari, tabatin 12 morto di cual 6 den tres dia di tempo, y 3 den 5 dia, pues casi 1 morto cada pasa dia. Tabatin 4 dia cu tabatin 2 morto pa dia, y 4 dia cu tabatin 1 cada uno.