Tin diferencia di opinion den coalicion riba vacuna Covid19

ORANJESTAD – Tin un diferencia di opinion entre propio miembronan di coalicion di Gabinete Wever Croes riba e asunto di vacuna contra Covid19. E diferencia ta entre RED contra MEP y POR. Mientras cu e diferencia aki no ta motibo pa tin crisis den e gabinete, e momento pa e diferencia awor no ta bin na e miho momento, ora cu e gabinete ta den un proceso pa concientisa y convence e mayoria di población pa vacuna, pa tin un miembro di e propio gabinete ta rechasa esaki. Den un reaccion breve pa e portal aki, prome minister Wever Croes a bisa di no ta na altura di e pensamento di partido RED, pero cu ta normal cu tin hende cu por ta diferencia di opinion.

SECRETO PUBLICO

No ta un secreto cu pa varios dia caba e lider di partido RED (lesa:Ricardo Croes) publicamente ta bisa di ta contra e vacuna. Riba su pagina di Facebook el a pone su opinion y constantemente a y ta duna informacion pakico e ta contra. Hasta den un reaccion pa e portal aki, sr Croes a confirma su pensamento y a puntra si nos ta na altura di e efectonan y si a lesa tur publicacion riba e vacuna. 

REACCION PROME MINISTER

E mandatario for di su reaccion na e portal aki, a mustra di no tabata na altura di e pensamento di e lider di e partido miembro di coalicion. “Bo sa, mi no tabatin e combersacion ey cu Ricardo, pa mi conoce su opinion ni su argumentonan. Pero claro, mi conoce mas hende cu ta bisa cu nan no kier vacuna” E mandatario a cuminsa na bisa. E ta referi na e grupo di persona cu ta duda, cu tin preocupacion pa cu e vacuna. Ora cu a sigui puntra, e mandatario a sigui bisa:”Mi no tabata sa cu esey tabata e opinion (di Ricardo Croes:red), pero sigur lo mi tin un combersacion cu ne” e mandatario a sigui bisa. El a sigura cu su dokter di cas mes a recommend’e pa e tume, y pa Aruba ta mas miho prepara, e isla pa 80% (mas of menos 90 mil hende) mester ta vacuna pa asina nos tin un ‘herd community’ prepara y cu nos isla por sigui bek normal manera cu nos tabata antes. Of por lo menos mucho mas di loke nos ta awor. Mes momento, e mandatario a sigura di lo respeta decision di esnan cu no kier vacuna, aun despues di tende tur banda di medaya.