Corsou den gara di apelacion caso Magnus awe

WILLEMSTAD – For di awe mainta atrobe, Corsou lo ta den e gara di e caso grandi di asesinato di politico Helmin Wiels, esta caso Magnus, pero e biaha aki e parti di apelacion. Ta trata di e tres sospechosonan Carlos Pieter, Dangelo Damascus y esun principal Elvis Kuwas cu a apela nan sentencia di aña pasa september. Corte di apelacion a reserva e proximo 4 dianan pa trata e caso, y tin tambe e fecha riba cual lo dicta e sentencia.

Den caso di Kuwas, e ta bringando su sentencia di bida largo, y ta desmenti tur tres morto pa cual e la keda sentencia aña pasa. Pieter y Damascus ta apelando nan sentencia contra otro delitonan pa cual nan a keda sentencia na september. Pa e caso di Magnus mes, nan a wordo declara liber. Pero aki si Ministerio Publico ta apelando e libertad aki. Pieter ta wordo acusa di ta complice den un atraco violento, hunto cu Damascus, cu tambe ta wordo acusa pa ta den posicion di arma.

E forma con e proceso lo cana ta cuminsa for di awe mainta 9’or pa 12’or unda lo trata e caso di Damascus (hechos y circumstancianan). Merdia lo sigui 2’or te 5’or pa trata sospechoso Damascus (tambe hechos y circumstancianan). Diahuebs lo cuminsa pa 9’or cu e sospechoso Kuwas (hechos y circumstancia personal), sigui pa e requisitorio entre 2’or pa 5’or den tur e casonan. Diabierna ta cuminsa pa 9’or pa 12’or cu Damascus (e pleidooi, replica, duplica y ultimo palabra) sigui pa 2’or pa 5’or pa Kuwas (tambe e pleidooi, replica, duplica y ultimo palabra). Ta finalisa diasabra cu Pieter (e pleidooi, replica, duplica y ultimo palabra), y for di 2’or pa 4’0r e reserva den tur e casonan. E sentencia ta wordo dicta dia 20 di februari 2015 pa 2’or di atardi pa tur e tres casonan aki.

Pa e caso aki, diadomingo ultimo autoridadnan a transporta Kuwas for di Hulanda, pa e por ta presente pa e caso di e siman aki. E ta sintando su castigo na Hulanda, y ta bolbe Hulanda despues cu e caso termina. Mescos cu den e prome caso, e no ta bolbe pa tende su sentencia. NoticiaCla.com lo sigui e caso y presenta e resultadonan manera nan bira conoci. Foto di e yegada di Kuwas diadomingo, ta cortesia di matutino Extra.