- Wever: Fin di di dos cuartaal 2024, centro di Oranjestad ta haya mas luz
- Banco Central ta mantene e tasa di reserva obligatorio na 22,0 porciento
- DEA: Cabesante y docentenan ta sigui prepara pa introduci Papiamento na scolnan basico
- A.T.A.: Por Mira Documentario Blue Lizard Effect via nos Planta Nacional TeleAruba
- Corte: Caso ‘Isla di Oro’ ta sigui fin di luna awor, cu mesun huez
KvK a topa cu gobierno riba mehoracion economico di Aruba
ORANJESTAD – Riba diabierna, 19 di februari ultimo, directiva di Camara di Comercio y Industria Aruba (KvK) a tene un reunion cu señora Evelyna Wever Croes, Prome Minister, y señora Xiomara Maduro, Minister di Finansas, Asuntonan Economico y Cultura, tocante cierto temanan, incluyendo algun punto cu ta figura den e “Landspakket” Aruba. E acuerdo cu Hulanda ta fungi como un guia pa nos Pais pa cu e decisionnan cu wordo tuma den bienestar di nos comunidad y lo mester conduci na reformanan structural, economico, financiero, social y institucional cu e meta pa haci Aruba mas resistente y menos vulnerabel, sin pone nos autonomia den riesgo.
KvK a combersa cu e mandatarionan tocante puntonan cardinal pa fortalece nos economia y pa por garantisa e stabilidad y siguridad economico y social di henter e comunidad di Aruba. Temanan cu a wordo discuti tabata entre otro e revision di e sector financiero, e reforma fiscal, e importancia pa trece cambionan riba tereno economico y e reformanan necesario pa optimalisa e clima di inversion mas lihe posibel. Alabes, a haya un update di e pasonan cu gobierno ta tumando pa actualisa y flexibilisa e leynan laboral, locual den KvK su opinion ta di gran importancia pa reactivacion economico haciendo e atractivo pa un compania mantene y/of tuma un empleado den servicio. Minister di Labor y Asuntonan Social, señor Glenbert Croes, actualmente ta trahando riba e tramitenan y lo yama a corto plaso un reunion tripartiet cu e gremionan comercial y sindical.
E desaroyo di e sectornan prometedor tabata un otro punto riba agenda. Den e cuadra ey KvK a ofrece di duna aporte y comparti e pensamento riba e pasonan cu Aruba lo mester tuma pa promove e sectornan prometedor. Siman pasa, Camara di Comercio a reuni cu representantenan di e sector di agricultura. A trece dilanti e retonan existente cu ta stroba haci negoshi. Via KvK sector priva por bin dilanti cu su sugerencianan. Den e proximo lunanan KvK lo delibera cu representantenan di diferente sector economico cu e meta pa guia e proceso di cambio cu conseho directo for di sector priva. Esaki lo pone e base principal y cuadra pa tuma decisionnan cu lo resulta den un ‘win-win’ situacion pa nos pueblo, comercio y Gobierno. Ta importante si pa bin cu solucion cu ta e.o. factibel, sostenibel y practico.
Como respresentante di sector priva, KvK su rol durante e implementacion di e Landspakket ta pa yuda conduci na reformanan structural, economico y financiero, cu ta crea espacio empresarial atractivo y atrae inversionnan cu ta contribui na economia di Aruba. KvK ta para tras di e desaroyo di un miho legislacion y aplicacion di stipulacionnan cu lo yuda na brinda miho servicio di e sector publico.
Un pronto mehoracion y recuperacion di nos economia ta primordial pa cada un di nos, pesey ta esencial pa tuma e pasonan necesario pa por logra esaki. Mescos cu gobierno, KvK tambe ta kere cu ta sumamente importante pa por sigui reduci e riesgo di contagio di e coronavirus y ta haci un apelacion na un y tur, specialmente e comunidad empresarial, pa sostene y promove pa tuma e vacuna.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
DEACI a otorga mas di 100 permiso pa negoshi nobo caba den 2024
ORANJESTAD - Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.
Durante Seatrade 2024, islanan ABC a trata esfuersonan pa desaroyo regional
ORANJESTAD - E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece.
CAFT: Adapta presupuesto 2024 pa inclui surplus di 200 miyon di 2023
ORANJESTAD - Den su conseho recien tocante di e di dos modificacion di presupuesto stipula 2023 (BW), e colegio di supervision financiero CAft a indica cu e ta anticipa resultadonan positivo inespera adicional. Cu e di tres raportahe di ehecucion (UR) ta confirma e imagen aki. CAft ta anticipa cu Aruba lo por cera e aña cu un surplus di financiamento di mas cu AWG 200 miyon pa e sector colectivo, loke ta 3 porciento di e producto nacional bruto (bbp). CAft ta conseha Aruba pa emplea e resultadonan positivo inespera pa amortisacion di debe, loke ta necesario pa baha e presion presupuestario di e gastonan di interes y pa crea espacio pa otro gastonan necesario. Enbista di e hecho cu e resultado lo sigui impacta na 2024, CAft ta pidi boso pa adapta e presupuesto na e dato aki den e prome BW 2024.
Follow NoticiaCla
