Oduber: Pa dia tin 10 pa 30 hende ‘no show’ pa vacuna contra Covid19

ORANJESTAD – Desde cu e operacion di vacunacion contra Covid19 a inicia, tin un cantidad di 1 pa 5% di esnan cu no ta ‘show up’ pa nan cita. Esaki ta traduci entre 10 pa 30 persona pa dia segun e minister di salud Dangui Oduber. Ora cu esaki sosode, ta pasa mesora pa e lista di espera y ta yama esnan cu ta bin siguientemente na remarke pa un cita. Asina ta percura pa no disperdicia ningun vacuna. E forma con esaki ta functiona, ta cu e ‘tempo di bida’ pafo di su ambiente ta mas of menos 3 pa 4 ora. Unabez cu esey pasa, mester tira e vacuna afo. Pero danki Dios segun minister Oduber, te awor no tabata necesario pa tira vacuna afo ya cu a logra haya reemplasante pa tuma e dosis e ora. Manera por a spera, tabatin critica ora cu cierto hende cu no necesariamente ta ‘fit e profile’, esta ta den e grupo di momento pa vacuna, ta haya un vacuna. Nan ta hendenan cu a informa cu nan ta dispuesto y disponible cualkier ora pa ricibi e vacuna. Tambe por ta cu nan tin un otro situacion cu ta merece un vacuna  y di otro forma e vacuna lo a bay ‘perdi’ toch. Na final di cuenta, tur hende mester vacuna y mas hende haci esaki, miho pa nos isla su recuperacion. Esaki den sentido cu mas lihe contene e virus su efecto, mas liher por cuminsa suavisa medidanan cu aworaki ta strobe nos di tin un bida ‘normal’.