Tres minister di gabinete Wever Croes a vacuna contra Covid19

ORANJESTAD – Dialuna atardi tres minister di Gabinete Wever Croes a vacuna contra Covid1   9. Un decision cu segun informacion di e prome mandatario na noticiacla, a wordo tuma dialuna merdia. Manera cu e portal aki a informa mas prome, tabata preocupa cu e cifra di registro inicial di e grupo di 60+ cu mester a cuminsa vacuna e siman aki. E grupo aki ta mas of menos consisti di 17 mil persona. Pero ta apenas 5 mil so a registra, pues lagando 12 mil afo. Esey a pone cu contrario na e prome decision di no vacuna awor, y warda nan turno netchi manera tur hende, a opta pa tuma e rumbo aki. Tabatin hopi di e grupo cu no kier vacuna, cu kier a mira gobernantenan vacuna prome, y wak despues con ta bay. Y si nan vacuna, esta e gobernantenan, lo esnan cu ta contra, tambe dicidi. Por lo menos, esey tabata e gritonan eyfo. Y cu esey den mente, minister presidente Evelyn Wever Croes, Minister di Salud Dangui Oduber y minister di Economia Xiomara Maduro, a vacuna na Centro Libertador Betico Croes dialuna atardi. Nan tur a bisa cu nan no a sinti nada y cu nan a keda bon bon.