Aruba Bank a apela sentencia den caso cuenta bancario di Bochincha Container Yard

ORANJESTAD – E instituto financiero Aruba Bank a apela e sentencia reciente contra dje pa e caso di habrimento di cuenta bancario pa e negoshi Bochincha Container Yard (BCY) di comerciante y ex politico Otmar Oduber. Asina e portal Antiliaans Dagblad ta raporta diabierna den su edicion. Recientemente huez a dicta cu e banco mester habri un cuenta bancario comercial pa e negoshi menciona, y mester haci esaki dentro di 24 ora cu e sentencia ta presenta. Esaki, no obstante cu e propietario esta sr Oduber ta un sospechoso den un caso penal riba fraude y corupcion. E status di Oduber no por ta un motibo pa cual e banco ta nenga di habri e cuenta. 

E APELACION

E banco a dicidi di no acepta y mientras a respeta e decision y ehecuta e sentencia, e ta apela esaki tambe mes momento. E banco, segun e portal, a ricibi un multa di mei miyon florin caba pasobra un doño di trabou a usa su empleadonan pa deposita su placa pe y no kier cana un risico igual e biaha aki. Como tal a opta pa apela e sentencia. Noticiacla a compronde si cu mientrastanto e sentencia dicta den prome instancia tabata ehecutable mesora, pues e banco mester a habri e cuenta, y no ta asina cu e por warda e apelacion prome cu e habri e cuenta. Si dado caso resulta cu e gana e caso den apelacion, e lo por mas probable cera e cuenta. Pa loke ta e prome sentencia, corte a obliga e banco habri cuenta bancario di e comerciante, y si dado caso, e caso penal tuma lugar y sr Oduber keda sentencia, e banco tin dos luna pa cera e cuenta bancario di e negoshi cu e ta registra como doño, esta BCY.  NOTA: E potret ta di archivo di e portal aki di e abogado di Aruba Bank, sra Theresa Croes.