Corte ta dicidi otro siman si TDQ na Hulanda ta legal of no

DEN HAAG – Corte Hulandes ta dicta sentencia te otro siman diabierna riba e asunto di Toque de Queda. Asina Hof a dicidi diabierna mainta despues di a trata e caso extenso di apelacion cu gobierno Hulandes a haci, contra sentencia di un caso sumario di diamars ultimo. Esey ta nifica cu por lo menos te otro siman diabierna, e TDQ ta keda vigente. Si Corte otro siman dicidi otro, esaki por cambia e maneho di e TDQ. 

E SITUACION

Tabata diamars mainta cu un sentencia di huez a ‘bruha’ e plan di gobierno Hulandes, ora cu e huez a dicidi e momento ey pa para e TDQ abruptamente, cuestionando su legalidad. Mes momento Gobierno Hulandes a apela y pa atardi/anochi un huez a suspende e sentencia ey pendiente e tratamento di e caso di apelacion awe diabierna. Esey a nifica cu te cu awe, e TDQ tabata vigente. Pero awor cu Corte a dicidi di dicta sentencia te otro siman, e TDQ tambe ta keda vigente un siman mas.