Cuerpo policial manca debi na hopi contagio interno cu Covid19

ORANJESTAD – Cuerpo policial lo ta basta manca, y un gran parti debi na Covid19. Esaki pasobra lo tin un cantidad di polis cu ta contagia cu e virus y ta na cas den isolacion. Y esnan cu no ta infecta, ta na cas tambe pero den cuarentena, debi cu nan lo tabatin contacto cu esnan cu ta positivo. A compronde cu por lo menos 13 polis na e warda na Noord (Shaba) ta na cas contagia cu e virus, y e resto ta na cas den cuarentena. Na Macuarima tin por lo menos 3 cu ta positivo y e resto na cas den cuarentena. Y esaki ta pone cu cuerpo policial ta basta manca. A compronde cu p.e. e asina yama ‘straat dienst’ na Noord ta down, debi na e situacion di Covid19. 

FAYO DEN TEST

A compronde cu tabatin un grupo grandi di persona (entre nan polis)  cu lo a test negativo na prome instante, lugar a resulta cu nan lo tabata positivo. Pero pa ora cu a bay yama nan bek, ya nan (entre otro e polisnan) tabata bek na trabou caba. Como tal, esaki a pone cu esnan afecta, por a pega varios otro colega di trabou y otro hende, (incluyendo polis) e momento ey.