Varios aeroliña mericano a scohe Aruba pa ‘sconde’ di e tormenta

ORANJESTAD – Varios avion Mericano a pasa algun anochi na aeropuerto di Aruba debi na e tormenta di sneeuw na e parti Noord Oost di Merca. E ta un bista no usual pa Aruba. E tormenta di winter a azota e parti noordoost di Merca dialuna afectando miyones di persona y forzando e cancelacion di hopi buelo. Biaheronan a encontra nan mes den un situacion di caos ora cu aerolineanan a reacciona na e tormenta cu e cancelacion di mas cu 7500 buelo te cu diaranson. Di eseinan, por lo menos 3200 ja a wordo anuncia for di Diadomingo. Esaki tabatin su influencia pa aeropuerto di Aruba, pasobra debi na demanda popular, varios aerolinea a scohe aeropuerto di Aruba como nan lugar pa pasa anochi.

PREPARACION

Desde fin di siman, aeropuerto ta trahando di serca cu e aerolineanan, ATA y AHATA pa yuda e pasaheronan cu nan buelo a wordo cancela pa asina extende nan estadia y organisa buelonan alternativo. Naturalmente, e situacion ta depende riba e disponibilidad di asiento y tambe riba e pronostico di tempo na Merca pa wak si e buelonan por bai door of no. Actualmente, buelonan pa e parti noordoost di Merca ta wordo spera pa continua desde Diaranson atardi, y mayoria di aerolinea ta avisa cu nan ta spera cu tur cos lo normalisa pa Diasabra.

SITUACION

Aeropuerto di Aruba ta conseha tur pasahero biahando pa of biniendo for di e parti noordoost di Merca pa tuma contacto cu nan aerolinea pa wak si tin algun cancelacion di buelo y/of si tin orario nobo di yegada of salida di nan buelo. Banda di e pasaheronan cu mester a keda Aruba, e tormenta a crea un bista unico pa nos na Aeropuerto di Aruba.