Minister: Preparando pa cumpli cu deadline di maart pa e landspakket

Minister: Preparando pa cumpli cu deadline di maart pa e landspakket

Posted on 02/18/2021 3:49 pm AST | Updated on 02/18/2021 3:50 pm AST

ORANJESTAD – Gobierno di Aruba ta trahando pa cumpli cu e varios deadlines poni pa cumpli cu ne pa loke ta e landspakket. Asina e mandatario a bisa diahuebs mainta durante su conferencia di prensa. Entre nan tin 7 accion tumando lugar pa ehecucion di algun tema cu ta trata finansa y economia den e Landspakket

CUMPLI CU CONDICION

Pa ricibi e yudansa financiero for di Hulanda, Aruba mester cumpli cu algun condicion cu ta poni den e landspakket cu a keda acorda cu Hulanda dia 13 di november 2020. Dia 1 di februari 2021 e agenda di e trabounan necesario pa por cumpli cu e condicionnan pa e promer kwartaal di 2021 a bira conoci. Pa locual ta e agenda di ehecucion cu ta trata finansa y economia, Minister Maduro ta informa cu tin 7 accion tumando lugar pa asina por cumpli cu e deadline di 1 di maart. Ta trata di puntonan riba e tema di A. Maneho financiero, C. Impuesto, D. Sector financiero y E. Reforma economico.

MANEHO FINANCIERO

Den cuadro di fortalese e control financiero na nos Pais door di Colegionan Halto di Estado, minister Maduro a informa cu Departamento di Finansa ta trahando un lista di e leynan cu ta necesario pa reforsa e control financiero cu tin prioridad pa keda introduci. Banda di esaki Departamento di Finansa ta trahando tambe riba un 'gap-analyse' pa saca afor con pa mehora e proceso di control financiero actual. Ta trata aki di puntonan A1.1 y A1.2 di e Landspakket.

IMPUESTO

Riba e tereno fiscal, Departamento di Impuesto DIMP ta trahando pa presenta un plan pa investiga cual sistema di impuesto indirecto lo surti Aruba. Banda di esaki DIMP ta trahando tambe riba un plan con pa mehora e organisacion pa asina por yega na cobransa mas optimal di impuesto. Riba nivel di ambtenaar, DIMP a yega na un entendimento cu otro partners den Reino pa asina Aruba por sera un Acuerdo di Impuesto hunto cu Hulanda, Corsou y Sint Maarten y asina evita evasion di impuesto den Reino. Ta trata aki di puntonan C1.1, C3, C4 y C5 di e Landspakket.

SECTOR FINANCIERO

Debi cu e integridad di Aruba su sistema financiero ta wordo evalua e aña aki pa Caribbean Financial Action Task Force CFATF, Departamento di Legislacion ta bay presenta un agenda detaya di e proceduranan y e leynan cu mester keda adapta pa Aruba por pasa e evaluacion aki exitosamente. Ta trata aki di punto D4.1 di e Landspakket.

LO BRINDA MAS INFORMACION SEGUN DEADLINE

Minister Maduro ta enfatisa cu na e momentonan aki hopi trabou ta tumando lugar na diferente departamento di Gobierno pa asina por yega na e informacion y plannan necesario pa por ehecuta e puntonan di e Landspakket. Lo purba mas cu por pa keda informa riba e ehecucion di e agenda basa riba e deadlinenan cu a keda acorda. E proximo deadline cu ta concerni e temanan di finansa y economia pa e promer kwartaal ta 15 di maart pa un plan pa reduci 'red tape,' 16 di maart pa presenta un plan con DIMP, notarionan, svb y fondo di pensioen por haya informacion bancario,  15 di april pa presenta un plan pa scrutina subsidio y pa presenta un plan con pa haci e compra di servicio y producto door di Gobierno mas eficiente y eficas. Na april of mei ta spera di haya e rapport di IMF su 'quick scan' di e sector financiero y e control riba e sector aki na Aruba cu ta wordo haci na e momentonan aki via IMF su 'Article IV mission.'

  • Parlamento a aproba Codigo Civil nobo e.o. implementacion controversial pa registra union civil

    Parlamento a aproba Codigo Civil nobo e.o. implementacion controversial pa registra union civil

    ORANJESTAD – Despues di mas of menos 5 ora di debate, Parlamento cu 17 voto pro y 4 contra, a aproba e introduccion pa e cambionan cu Parlamento aproba na 2016 cu ta inclui partinan nobo den Buki 1 (derecho personal y familiar), Buki 3 (derecho di propiedad), Buki 4 (derecho di herencia) y Buki 7 (acuerdonan special) di nos Codigo Civil, y e punto mas controversial, e registracion di union civil, mas concreto registracion di parehanan di mesun sexo den un union civil.

  • Diferencia di opinion den RED mes pa vacuna contra Covid19

    Diferencia di opinion den RED mes pa vacuna contra Covid19

    ORANJESTAD – Si prome tabata parce cu tabatin un diferencia di opinion entre dos partido di e gobierno di coalicion MEP/POR/RED pa cu e proceso di vacunacion (MEP y RED), awor e diferencia a bira uno entre e propio minister di RED Rudy Lampe y e lider di e mesun partido Ricardo Croes pa cu e uso di e vacuna. Dialuna minister Rudy Lampe a manda un comunicado clarificando su punto di bista riba e tema di vacuna contra Covid19. Aki a sali na cla cu e mandatario,- contrario na su colega di partido -, e ta pro pa tuma e vacuna. Mester bisa si, cu e minister ta sigura cu ta ‘pa motibonan cientifico’ cu e ta dispuesto pa tuma e vacuna y no sin mas. Esey mientras cu sr Croes si ta mustra cu e si no ta pro, ni usando argumentonan cientifico. Tambe mester bisa cu cada ken tin derecho di nan propio opinion, y cu esey ta sano y democratico. Punto ta sinembargo, cu den e caso aki segun personan den e campo, cu un division den propio coalicion no ta yuda cu e proceso aworaki di convence un grupo grandi den comunidad pa tuma e vacuna. Den un situacion asina, tur hende mester ta uni pa mustra un solo forza, sigur si ta sali di seno di gobierno. Si tin duda entre e propio miembronan di coalicion, esey ta traduci den un inquietud den e propio pueblo. Esey a pone tambe cu si anteriormente ministernan di MEP a bisa cu nan no ta bay vacuna prome, a dicidi despues di haci diferente, netamente cu e fin pa convence un grupo grandi di persona cu ta sceptico riba e tema. 

  • Parlamentario a bira emocional riba cambio di ley cu ta registro di union civil

    Parlamentario a bira emocional riba cambio di ley cu ta registro di union civil

    ORANJESTAD – Den un disertacion cu a bira emocional y personal dado momento, Parlamentario Setty Christiaans a cuestiona e forma con den misa pastor ta pidi esnan den misa pa ‘ilumina’ sinti di Parlamentarionan pa tuma e miho decision y ta referi aki na e derecho registra union civil, y mas aun, esun di mesun sexo. Segun sra Christiaans, a cuestiona e asunto aki, splicando e situacion cu el a experencia den misa recientemente. y cu ta pone cu esaki ta dividi esnan presente riba e tema. E no a haya esey apropia. Por a compronde pues cu esaki a sosode den misa. E Parlamentario no a haci mencion di e misa ni pastor en cuestion.

  • Ex minister di Aruba Pedro ‘Charro’ Kelly a bay sosega

    Ex minister di Aruba Pedro ‘Charro’ Kelly a bay sosega

    ORANJESTAD – Dialuna mainta, a bira conoci cu ex minister y lider di partido Accion Democratico Nacional (A.D.N.) Pedro ‘Charro’ Kelly a bay sosega. Durante apertura di e reunion Parlamentario awe mainta, Parlamento a tuma un minuut di silencio na su honor. Sr Kelly, tabata parti di partido MEP for di añanan 70, y e prome directiva di e partido, y a aparece riba varios lista di e partido geel, for di 1973 (posicion 12) te na 1983 (posicion 3). Pa eleccion 1985, sr Kelly a forma su propio partido A.D.N. y a logra un asiento y bira e prome minister di obras publica na 1986 ora cu Aruba a logra su Status Aparte. Den su periodo di un aña y mei cu e tabata na poder, el a bira conoci pa e cantidad di asphalt cu e la logra pone rond di Aruba. Noticiacla ta manda palabra di condolencia na famia di sr Kelly. 

  • Oduber: Pa otro siman lo caba e prome lote di vacuna

    Oduber: Pa otro siman lo caba e prome lote di vacuna

    ORANJESTAD - Cu e speed cu Aruba ta vacunando pa otro siman diasabra 06 maart 2021 nos lo caba cu e promer batch di 11.700 vacuna cu nos a ricibi. Asina minister di salud Dangui Oduber a bisa e portal aki diadomingo. Segun e mandatario, for di luna di december 2020 su ministerio conhuntamente cu DVG y varios otro departamento tawata preparando pa e yegada di e vacunanan. " Nos a traha un plan di ehecucion cu ta e plan nacional di vacunancion di pais Aruba". E promer siman di januari 2021 e minister a anuncia e plan aki na communidad y tambe a splica kiko ta bira e strategia pa nos por vacuna nos communidad pa hunto nos por vence e pandemia aki. Aruba a haya bishita di RIVM dia 25 januari 2021 y nan a keda sumamente impresiona con Aruba tawata preparando su mes.

  • Bikker: Sospechoso M. a haya toegangontzegging pa Bestuurskantoor

    Bikker: Sospechoso M. a haya toegangontzegging pa Bestuurskantoor

    ORANJESTAD – E sospechoso di abuso sexual di menor, Jason M, a haya ‘toegangsontzegging’ pa e.o. Bestuurskantoor/Cocolishi. Asina minister di husticia mr Andin Bikker a informa noticiacla diabierna merdia. Esaki tabata necesario pasobra e persona aki tabatin aceso na e areanan menciona pa por a eherce su trabou mediatico pa e.o. e mandatario di husticia. 

  • Powered by SETAR