Lo cuminsa eherce control estricto atrobe pa drenta Parke Nacional Arikok

ORANJESTAD – Lo cuminsa eherce control estricto atrobe pa entrada di Parke Nacional Arikok. Esaki segun e informacion cu e parke a duna diahuebs. Segun e comunicado, durante e inicio di Covid-19, naturalesa a bira un di e fuentenan mas bishita pa asina e comunidad por a relaha y alaves aprecia e bunitesa diverso di nos naturalesa. Debi na e situacion di Covid-19, control stricto no tawata ser ehecuta na Parke Nacional Arikok, pero Park Rangers lo cuminsa efectua e controlnan stricto entrante 20 di februari proximo cuminsando cu e areanan mas popular: Daimari, Shete, Conchi, San Fuego, Jamanota, Sabana Basora, Butucu y Vader Piet. 

Cu e introduccion di e Decreto Ministerial di 2009, Fundacion Parke Nacional Aruba a inicia cu e entrada di conservacion pa Parke Nacional Arikok desde prome di november 2010. Durante e añanan a sa di expande e opcionan na diferente categoria di participacion. Actualmente ta cobra un suma abou pa persona local y mucha bou di 18 aña ta drenta pornada. Por paga pa miembrecia tambe annual pa un suma specifico.  CUMPRA ENTRADA

Durante e fin di siman nos dilanti, nan ta avisa tur persona cu ta desea di bishita Parke Nacional Arikok  pa cumpra nan entrada di conservacion di anterior of lo por hasi esaki mainta trempan ariba diasabra of diadomingo entrante 5:30 di mainta. Eteam di sales lo ta cla pa juda y duna tur informacion necesario na e Centro di Bishitante situa na San Fuego. 

Na peticion di e bishitantenan cu ta desea di saca nan miembrecia anual online, nanta dirigi un y tur pa e pagina di Facebook: Aruba National Park, caminda e prome post tin tur instruccion pa asina completa e miembrecia anual online. 

FPNA ta encurasha tur bishitante pa yuda nos conserva e areanan natural por medio di recrea na un manera responsabel y sostenibel.