Jan de Ruijter ta contesta acusacionnan di Otmar Oduber

ORANJESTAD – “Nunca mi a cay den man di husticia, y of bay sera. Mi tin prueba di tur cos loke mi ta acusa hende di dje”. Asina conocido autor y awor politico Jan de Ruijter ta sigura NoticiaCla.com den un entrevista habri recientemente. E ta contesta preguntanan basa riba varios acusacion cu tin den su contra. Tambe acusacionnan cu e ta haci na cierto politiconan y otro persona na Aruba. Siguientemente e serie di pregunta y contesta cu a wordo haci recientemente.

NC- Bo ta culpa minister Otmar Oduber di un cantidad di cos (e.o. cu e ta corupto etc). Pero bo tin prueba di tur esaki, y si ta asina, si bo ta dispuesto pa duna NoticiaCla.com un copia di esakinan?

JdR – Sigur mi tin pruebanan hopi solido. Mi ta skibi solamente di cosnan cu mi por prueba y aclarea. De hecho, e hues den su sentencia di caso sumario cu Oduber a entama contra mi y cu e la perde, a adverti Otmar Oduber cu e mester ta conciente cu si e apela e caso, cu e lo tin hopi dificultad cu e pruebanan cu mi a entrega e tempo ey. Mi no ta kere cu ta corecto pa delantando e caso, mi entrega e prueba na un tercer partido. Mi ta kere cu ta mas miho pa mi warda e pruebanan aki pa e hues. Pero mi por sigura bo cu mi tin nan.

NC- Un otro acusacion di Oduber den bo direccion ta cu bo ta purbando di tuma venganza contra su persona, pasobra den pasado bo a pidie un trabou, y cu e la nenga bo esey ora cu e la bira minister. Y cu e ora como un vendetta personal, bo a priminti cu bo lo a caba cune den un forma di un ‘asesinato di caracter’.

JdR – Mi no a spera e pregunta aki, pero mi ta conteste cu placer. Na ningun momento mi a solicita pa un funcion serca e gobierno aki. Ningun manera. Esey ta un mentira flagrante. Loke cu a sosode, ta cu mi a wordo invita pa Otmar Oduber y Mike Eman pa traha un plan di maneho na 2008 y 2009. Mi a wordo pidi pa sali for di mi pensioen y pa yuda Aruba y su turismo. Na 2007 y 2008 mi a traha esakinan. Loke a sosode cu despues di e eleccion, diripiente nan no tabata disponibel mas. Nan a cambia nan telefon. Nan no a haci esey solamente cumi, sino cu decenas di otro persona mas. E momento ey mi a rabia hopi y enberdad mi a manda un email e ora ey den cual mi a skibi cu sigur mi lo a molestia AVP cu esey. E tabata un email emocional cu mi no mester a skibi. Mi a skibi e, pero mi mester tabata mas sabi pa a warda esaki den un lachi y revisa e carta despues di algun dia atrobe. Mi tabata asina bobo di manda e mail aki, pa cual mi a manda mi disculpa caba na e vespertino Amigoe. Mi a admiti cu tabata trata di un email emocional rabia. Mi no mester a hacie. Pero nunca mi a solicita serca Otmar Oduber. Nunca!

NC- Oduber tambe a haci algun declaracion contra bo manera cu bo tin problemanan psikiatrico, bo ta un ex adicto di droga, bo a wordo gara tras di stuur burachi. Pakico e lo bisa tur esaki?

JdR- E ta buscando algo riba nivel personal. Un pushi den preta ta haci salto nan straño. E no sa con e tin cu defende su mes cu contenido. Tur e loke e la bisa prensa dimi, y e documentonan cu e la entrega, ta declaracionnan nonsense. Mi ta haya esey ok. Mi no tin problema cu esey. Mi por bisa tambe hopi bon, cu tur cos cu e la declara (contra mi) den e proximo caso, lo mi uza den su contra. Laga e demostra dilanti huez cu e tin rason. E no por proba esaki. Nunca mi a wordo sera den prison, nunca mi a cai den man di husticia. Bon, cu excepcion di un multa inocente di un agente policial, cu ta sosode cu nos tur un biaha. Pasobra nos a core mucho duro, of no tin seatbelt bisti. E la bisa durante un encuentro cu prensa cu mi tabata den prison. No ta berdad. Mi ta bay use contra dje. Laga e bay proba lo contrario.

NC – E (Oduber) la bisa tambe cu bo tabatin problema cu droga den pasado. Cu bo sea tabatin problema of ainda tin problema cu droga y cu ta pesey bo ta bisa coy kens.

JdR – Laga e proba esaki. Si mi tin problema cu droga, laga e proba esey. Mi no tin ningun problema (cu droga).

NC – Que hubo di bo supuesto problemanan psikiatrico? Tur ta cosnan cu e (Oduber) ta bisa di bo. Pakico e lo bisa esaki. Tin algo di esaki of e ta simplemente inventa esaki contra bo?

JdR – Wak, mi a skibi den articulonan den matutino Solo, y a compare cu un evento di boxeo. Lo bo haya un “Thriller in Manila’ na Aruba. Mi ta bay dune un tremendo knock out. E por dal den bashi manera cu e kier y papia di ‘adicto’ y ‘double trouble’ y prison. Laga e dal bay. E tin cu bay responsabilisa su mes dilanti un hues.

NC – Bo ta blo skibi contra dje. Dia tras di dia. Ta parse cu no tin fin na esaki. Ki dia esaki ta caba? Na ki momento bo ta bisa cu ta basta y cu bo a haci suficiente, bo a demostra suficiente? Pasobra e cos aki ta sigui pa eternidad.

Jdr – Mi a pone como meta, ora cu na september 2012 publicamente riba canal 22 a declara cu si ningun otro hende para e proyecto Hard Rock, si gobierno no hacie, ami ta hacie como ciudadano. Mi tabata sa for di comienso cu ta trata di un proyecto coruptivo y fraudulento. Mi a haya mi gana dos aña despues na september 2014 a bira conoci cu e proyecto ta anula. Pami, despues di tur loke a pasa, esaki no ta suficiente. Mi ta para solamente ora cu Otmar Oduber drenta KIA. Ora cu e wordo sentencia di fraude y corupcion. E ta hacie y mi ta bay demostra esaki.

NC – Y si e no wordo haya culpabel? Ki bo ta haci e ora?

JdR – Wel, mi ta convenci cu e ta bay drenta KIA. Y mi ta sigur cu e ora ey mi lo ‘rest my case’. Y esey ta sosode despues di cu e wordo persigui y cu e ta haya su castigo.

NC – E aangifte cu bo a haci contra dje, awor Oduber a entrega un keho contra bo pasobra segun Oduber, bo denuncia ta uno basa riba mentira. Con bo ta reacciona riba algo asina?

JdR – Mi no ta kere cu e ta basa riba mentira. Si huez a permitimi pa sigui bisa cu e ta corupto, mi no ta kere cu mi ta bisando fantasia. Mi ta kere cu tin cosnan real eynan. Mi tin tur cos documenta, cu hopi cuidou y substancia.

NC- E ta bisa tambe cu no solamente bo ta acusa e, sino demas coleganan minister manera entre otro Paul Croes, Benny Sevinger y te hasta un director (di un banco) . Por lo menos 12 instancia Bo tin algo contra tur e hendenan aki?

JdR – Mi tin algo contra henter e gobierno. Henter e gobierno aki a kibra e pais aki y mande bancarota. Nos tin un debe di 6 biyon cu bo no por paga bek. Nan a kibra Aruba y awor nan ta celebrando. Claro mi ta protesta contra esaki. Otmar tin cu lesa mi articulonan tur y por ta sigur cu mi tin prueba y por proba tur esaki.

NC- Bo tin prueba tambe contra e otronan, manera entre otro director di Aruba Investment Bank y otro banconan.

JdR – Claro cu mi tin prueba contra e director di AIB, subdirector di Banco Central, 6 of 7 hende cu tabata den comision di evaluacion di Hard Rock Hotel. Contra tur mi a entrega keho. Tur a yuda. (FOTO archivo di  encuentro de Ruijter (banda robes riba e potret)  cu parlamentario hulandes Andre Bosman recientemente. )