Aruba a cuminsa vacuna su ciudadanonan contra Covid19

ORANJESTAD – Diaranson atardi manera programa, e prome 12 personanan di Aruba a haya nan vacuna contra Covid19. Ta trata di un combinacion di personanan di varios edad, pero cu tur ta cumpli cu e rekisitonan segun e plan di vacuna di e prome grupo. Den un tempo relativamente cortico, e grupo di persona aki a sinta, haya nan vacuna y keda cla. Ningun di nan, a sinti efectonan secundario den e prome 30 minuut despues di e vacuna. 

KEN A VACUNA

Entre esnan cu a vacuna, tabatin un ex gobernador, ex director di compania di utilidad, un pastor, un dokter di cas y un first responder. Tabatin tambe loke ta wordo yama ‘influencers’, esta personanan conoci cu tin influencia den comunidad. Ta trata di personalidadnan conoci manera p.e. Ruben Garcia director di Radio, fashionista Ronchi de Cuba, y Presentador di programa Xiomara Everon. Aunke nan edad ta basta jong, cada uno tabata cumpli, sea cu e tin p.e. diabetis, problema di curason, y otro factornan cu ta merece atencion inicial. Na final di nan session, algun di nan a papia y a mustra cu nan tabata sinti bon, y a recomenda pa tur esnan cu tin duda, vacuna. 

E lista completo di persona ta:

1. Dr. Kelvin Cayama - risico groep

2. Ruben Garcia - 60+

3. Jacky Wernet - risico groep

4. Jossy Lacle - 60+

5. Siomara Everon - risico groep

6. Dr. Joaquin van Trigt - huisarts

7. Dr. Dhyani Giel - 

8. Ronchi de Cuba - risico groep

9. Pastoor Toti - 60+

10. Olindo Koolman - 60+ ex Gobernador

11. Emira Rodriguez-Tromp (Juf Miertje) - 60+

12. Jourraine Halabi-Figaroa - Verpleegkunde HO

PROGRAMA

E intencion ta pa entrante diahuebs, for di mainta 8’or varios centro habri pa por cuminsa cu e prome grupo di riba 11 mil persona vacuna. E plan ta pa vacuna 800 persona dia, y esaki lo tin cu sigui pa 7 dia pa siman, te ora cu e cantidad di 11mil y pico vacuna termina. A compronde cu un total di 11 mil persona a preregistra. Esaki no kier men cu tur esakinan ta haya un chens di e prome lote.