Mutacion di variante cu a yega Hulanda ta limita imunidad contra Covid19

DEN HAAG – E mutacion di e variante di Inglatera di Covid19 a yega Hulanda. E noticia aki considera como alarmante, a keda publica den e portal Hulandes Het Parool diaranson. Ta trata di e mutacion version E484K. Esaki ta un cambio den e pico di proteina di e virus, cu a keda ‘infiltra’ mientrastanto den e variante Britanico, Sur Africano y Brasilero. Cada un di e variantenan tin 20 mutacion. E proteina (eiwit) ta di importancia pa e virus drenta e celnan humano, pero tambe ta e blanco di e anticuerponan cu ta wordo lanta pa un hende cu keda contagia cu e virus of e vacuna.

MIEDO

Tin e miedo cu e mutacion extra aki, e E484K, ta cambia e virus di tal forma cu e tin dos consecuencia,. Uno cu e imunidad cu a wordo crea pa un contagio anterior, no ta duna garantia contra un contagio un biaha mas. Tambe cu e virus cambiua ta wordo menos bon reconoci pa e vacuna contra e virus. Esaki pasobra e vacunanan ta desaroya contra e virus ‘bieu’ di Sur Africa y Brazil. 

ESTUDIO

Estudionan di Sur Africa ta mustra cu e vacuna berdad tin un efecto menos. Expertonan ta teme cu esaki ta debi cu e variante Sur Africano, ta carga e mutacion E484K. E vacuna AstraZeneca ta parce di ta traha asina malo den Sur Africa cu a dicidi di stop e uso aki di e vacuna ey, segun e relato di Het Parool.