Tormenta colosal di sneeuw afectando Noord Oost di Merca

WASHINGTON - Mas di 35 miyon persona na e costa nortost di Merca, for di Philadelphia pa Boston a percura pa ta na cas tempran dialuna, y prepara pa loke ta bira un tormenta colosal di sneeuw dialuna anochi pa diamars. E ta un tormenta feroz di sneeuw, acompaña pa biento di horcan cu lo por laga 1 pa 3 pia di sneeuw ora cu tur cos caba. E lo por paralisa e parti noortoost di Merca pa varios dia. A declara varios di e estadonan riba e ruta ey, den estado di emergencia, cu ta permiti e respectivo gobernadornan pa haya asistencia financiero pa e estadonan. Ya for di tempran dialuna sneeuw tabata cay y bula di banda.

Mientras cu e tormenta tabata yegando e areanan menciona, e areanan aki a practicamente ‘shut down’. Esaki ta nifica entre otro cu por lo menos 5.800 buelo pa y for di e areanan afecta, a keda cancela y hopi di nan lo no bula te diaranson posiblemente. Esaki lo afecta Aruba tambe y otro destinacionnan den Caribe. Tin un prohibicion pa ta riba caya pa e proximo 24 hora.