Parlamentario ta pone Crisis Team ‘scramble’ riba asunto di entiero

ORANJESTAD – Un parlamentario na Aruba diaranson a pone Crisis Team ‘scramble’ pa atende e asunto di entiero di personanan cu a fayece a consecuencia di Covid19. Despues di un reclamo prome den e matutino cu ta parti di e famia en cuestion, y supuestamente mirando cu ta trata di un parlamentario, Crisis team a yama un conferencia di prensa pa ‘aclaria’ e situacion, pero despues a cancela esaki.  Den e caso aki ta trata di entiero di mama di e parlamentario di partido MEP Endy Croes, cu ta forma parti di e gobierno na mando. 

CONFERENCIA

Tabata diaranson mainta durante un conferencia di prensa di fraccion di MEP, cu e parlamentario Endy Croes a ‘bati bel’ di alarma contra Crisis Team, como protesta con mester a experencia morto di su propio mama, debi cu segun sr Croes, esaki no ta forma di proceder cu un ser keri defunto. Crisis Team mesora a yama un conferencia di prensa pa atende cu e tema, pero algun rato despues a cancela esaki pasobra a opta pa yama un reunion di Crisis Team pa atende cu e tema aki. “Despues di e reunion di awe lo duna tur aclaracion necesario na prensa y comunidad” e mensahe a bisa.

KICO A PASA

Segun e Parlamentario, den fin di siman ora cu mester a dera su querida mama (sra Sofia Croes Rasmijn), a bin haya sa cu no por a mira e mama mas, debi na reglanan di protocol di DVG y Crisis Team. Esaki ta nifica cu e defunto, for di hospital ta wordo hinca den un saco di plastic special (Body bag) a la ‘eva y adam’, y ta wordo hinca den un caha di morto y asina so e famia por despedi di nan ser keri. Pues e parti unda cu por drecha e defunto pa su ultimo despedida, no ta permiti segun regla di DVG y Covid19. Esaki e famia a protesta y a tuma contacto cu DVG y Crisis team cu na nan turno, segun e parlamentario, a referi bek na e reglanan di e agencia funeraria. E ora e famia a opta pa cambia di funeraria y bay uno cu si tabata permiti pa por a drecha e defunto di tal forma cu por a dispidi di dje den un forma mas respetuoso. Segun e parlamentario, sinembargo na misa, un persona di DVG a yama y a bisa cu mester cera e caha, cual e famia a haci tambe. 

REGLA INTERNACIONAL

E parlamentario a cita parti di reglanan di World Health Organization (WHO) y RIVM di Hulanda, unda cu ta specifica cu si tene cuenta cu regla, por dera un defunto cu caha habri y por dreche pa su ultimo despedida. Esaki ta unda cu e parlamentario ta cuestiona e maneho ‘dictatorial’ manera cu e mes a yame, di trata defuntonan na Aruba relaciona cu Covid19. Segun e parlametario, nan aunke den tristesta, si tabatin e forza di bringa e asunto aki mei mei di entiero, pa nan mama haya un entiero digno. Pero e ta lamenta cu otronan ( mas di 60 defuntonan cu a pasa) no lo por a haci esaki y a haya nan mes ta despedi di nan famia den un forma no corecto. No ta conoci cua agencia funerario tabata wordo usa inicialmente. E portal aki a haci su propio observacion di reglanan segun World Health Organization (WHO) cu ta bisa enberdad cu no mester hinca e persona cu a fayece den un asina yama 'body bag', sin mester, y por wak e persona aki durante entiero. Un documentacion specifico ta relata na detayes pa un defunto cu fayece a consecuencia di Covid19.