Minister Wever: Etapa nobo pa Aruba a cuminsa, cu yegada di e vacuna contra Covid19

ORANJESTAD – Cu e yegada di e prome lote di vacuna contra Covid19 pa Aruba diamars, ‘un etapa nobo ta cuminsa’. Asina prome minister di Aruba Evelyn Wever Croes a bisa diamars algun rato despues di e yegada di e lote. E mandatario a pidi pa tur esnan cu tin duda, papia cu nan docter di cas pa asina sigura cu e vacuna ta loke Aruba mester pa por recupera di e sla cu nos a sufri. Un total di 11.700 persona lo keda vacuna den e proximo 2 siman y mei, unda cu ta programa pa por lo menos 800 persona pa dia, 7 dia pa siman, durante 8 ora pa dia, keda vacuna cu e prome lote. Despues lo bin e proximo lote di 11.700 lote cu lo bay pa e prome grupo cu a vacuna, cumpliendo cu nan di dos vacuna manera cu e regla ta stipula. E prome dos dianan, esnan di hospital lo keda vacuna, entre cual lo tin 10 personalidad cu ta cay den e edad di hendenan cu tin cu haya e vacuna, y nan ta esnan conoci di nos comunidad. 

Segun minister Dangui Oduber, Hulanda no a impone ningun regla cu ta prohibi e mandatarionan pa haya un vacuna prome. Pero ta consenshi a pone cu a dicidi cu no ta bay prome, djis pa convence hende cu e vacuna ta bon. Nan lo tuma e vacuna, ora cu nan ta na turno, segun e schedule traha cu ta bay segun grupo.