Corte: A suspende sentencia anterior, y Toque de Queda na Hulanda ta keda

DEN HAAG – E sentencia di e corte di Den Haag diamars mainta cu mester para e Toque de Queda (TDQ) mesora, a keda suspendi. Asina corte a dicidi diamars anochi den appèl na Hulanda. Esey kier men cu e TDQ ta keda vigente awe nochi. Segun Corte, e interes di Estado ta mas grandi cu e interes di e grupo di accion Viruswaarheid. Corte ta sinti cu mester evita un efecto di jojo, osea un dia si, un dia no. Esaki indicando cu si corte awor dicidi di no suspende e sentencia, y despues den un caso di profundidad dicidi otro, e ora mester bolbe adapta e situacion. E presidente di e grupo di accion a rabia. “Bo ta cometiendo un fayo grandi. Esaki ta inaceptabel. Bo a bay toch den contenido” Willem Engel a bisa. 

Prome cu e caso, tabatin e parti unda cu e grupo kier a ‘cambia’ e hueznan, pasobra e grupo no a considera e tres hueznan como imparcial. Pero corte a rechasa e peticion pues e hueznan original mes a trata e caso. Y awor ta trata e caso di apelacion, bayendo den contenido, diabierna mainta.