ATA: Turismo den februari ta lento y maart ta recupera miho

ORANJESTAD – Cifranan di turismo pa Aruba na februari lo ta lento pero ta spera recuperacion na maart. Asina un raportahe di oficina di turismo ta bisa. Segun e raportahe, un di e retonan grandi cu e industria di turismo pa Aruba a haya su mes confronta cu n’e pa 2021 ta entre otro e anuncio di e medida di testing pa e bishitantenan Mericano prome nan bolbe Merca. E medida aki a drenta na vigor dia 26 di januari 2021 y a pone cu hopi bishitante di Merca a regresa prome cu e fecha ey. Norte America ta e mercado mas grandi pa Aruba cu ta trece anualmente un average di 80% di e total di bishitantenan pa nos isla.

Naturalmente esaki –hunto cu otro factornan- tawatin su impacto riba e estadisticanan pa loke ta trata luna di januari – pero tambe pa e pronostico pa restante di e prome kwartaal di 2021 y e ahustacionnan pa e pronostico di 2021.

Debi na e diferente medida y scenarionan cu ta sigui cambia, AHATA a ahusta su proyeccion pa cu e grado di ocupacion pa e prome kwartaal di 2021 cu tawata proyecta pa 33% y awo ta proyecta pa 29%.

E cantidad di asientonan aereo for di Merca (e mercado mas grandi pa Aruba) pa e prome kwartaal ta mustra un caida actualmente di -14% (35.000 asiento menos) y awo ta proyecta na un total di 230.696 asiento.

Actualmente ta observa un scenario conservativo pa 2021 despues di a revisa proyeccionan pa kwartaal uno y pa restante di 2021. E proyeccion pa lunanan di februari y maart ta cu pa februari ta wordo spera un total di 34 mil turista y pa maart un total di 42 mil turista. E proyeccion revisa pa februari y pa maart ta den linea cu e scenario conservativo y aki por conclui cu por cera e prome kwartaal di 2021 cu un proyeccion bao di e scenario conservativo.