Grupo hopi indigna cu a pospone tratamento di ley cu ta trata union civil, te proximo aviso

ORANJESTAD – Tin un grupo relativamente grandi di persona cu for di ayera (diahuebs) a mustra nan disgusto y desaprobacion pa cu e decision di Parlamento pa pospone e tratamento di ley di Burgerlijk Wetboek (AB1989 no GT 100) , te proximo aviso. Mientras cu e ley ta trata un lista di cambio, variando di derecho di herencia pa cu tereno, y pa reparticion wordo amplia, e parti specifico di di union civil (geregistreerd partnerschap) unda cu e cambio mester ta di union civil entre homber y muher, pa djis ‘union civil’, lagando e parti di homber y muher afo, ta esun mas popular y pa cual tin e grupo indigna. E parti di e ley aki, ta crea posibilidad pa personanan di mesun sexo por registra e union civil tambe. Mientras cu tin mas asunto cu tin cu wordo cambia cu implementacion di e buki nobo di codigo civil, esaki ta e parti unda cu tin mas hende ‘indigna’, sea pro of contra. 

POSPONI PA ETERNIDAD 

Y e grupo cu ta pro pa e cambio, ta indigna cu atrobe ta pospone e tratamento di e ley aki, sin cu tin un fecha nobo. Otro reunionan a keda posponi tambe, pero a pone un fecha nobo pa trata esaki. Den e caso di e ley di codigo civil nobo, no a pone un fecha, cu ta pone cu esnan cu ta preocupa cu esaki lo bay den buki di olvido, por lo menos durante e termino cu falta pa e gabinete aki y parlamento falta prome cu e eleccion 2021.