Gobierno ta declara dialuna di carnaval liber, aunke no a cambia ley

ORANJESTAD – Den reunion di Conseho di minister diabierna 12 di februari 2021, a tuma decision cu ta reconoce e dialuna di carnaval, 15 di februari 2021 como dia liber, siendo e dialuna prome cu e diaranson di shinishi. Asina gobierno a bisa den un comunicado diabierna atardi, den un intento pa trankilisa e preocupacion cu tin den comunidad, tanto comercio como ciudadanonan cu kier sa kico ta kico finalmente.

LEY NO A CAMBIA AINDA

Remarcable ta cu esaki ta e caso, siendo cu e ley mes cu ta regla e cambio, no a pasa ainda. Den e mesun mensahe di gobierno ta bisa acerca cu ta declara e dia liber, ‘pendiente e cambio di articulo 22 inciso 1 sub B di e Arbeidsverordening 2013’ y e ratificacion di esaki por medio di un landsbesluit h.a.m. Actualmente e ley ta bisa cu e ta dia liber, tanten cu tin parada. 

APELACION

Mirando cu no a haci cambio na e ley ainda, por a solamente haci un apelacion na sector priva, pa ‘considera’ e dia aki tambe como uno festivo. Esaki pasobra no por obliga ningun negoshi pa trata esaki como uno festivo legalmente ainda. E portal aki a compronde cu tin hopi negoshi cu tin pensa di habri normal dialuna, y paga normal, esta 100% envez di 200% ora cu ta un dia liber. Y nan a informa e trahadornan tambe, mirando cu legalmente, e no ta un dia liber oficial conforme ley. 

DISCUSION

E discusion legal ta uno andando varios dia caba, unda cu abogadonan ta debatiendo esaki, indicando cu e ley ta bisa claramente cu e ta funciona solamente y tin base legal solamente si tin un parada di carnaval e dia anterior. Si esey no ta e caso, e dialuna no ta liber. Y si e no ta liber, no por considere como tal y no paga e trahadonan como si fuera e ta un dia liber.