DIMP: Casi 30% di number di auto no tin nada paga pa 2021

ORANJESTAD – Casi 30% di numbernan di auto (26.197) no ta paga ainda pa 2021. Asina vocero di Departamento di impuesto DIMP, Meverly Romano a bisa noticiacla diabierna atardi. Di otro banda, un total di 69% number di auto si a cumpli, cu ta 61.480 contribuyente/number di auto. Di e grupo aki, 36.821 number a keda full paga, mientras cu 24.659 number ta mitar paga. Pa esnan cu no a paga nada ainda, si nan no cumpli pa 15 di februari 2021, nan lo haya un multa entrante 16 di februari 2021. 

FECHA

E fecha final original tabata 1 di februari 2021 pa paga por lo menos e prome mitar di e number di auto. Pero despues minister di Economia a duna un siman mas di tempo, cu a vence siman pasa diabierna 5 di februari 2021. Tambe, DIMP a tene cuenta cu e situacion di e contribuyentenan. Tin persona cu a cobra laat, otro ta ricibi ayudo social y otro ta sin trabou. Como tal DIMP a duna espacio di 10 dia mas y awor a fiha e fecha di boet pa 16 di februari 2021. 

ULTIMO DIA PA PAGO

Esaki pues ta nifica cu e ultimo dia pa haci pago online ta 15 di februari (dialuna awor). Ta importante pa ora di haci pago pa menciona persoonsnummer, periodo (2021) y number di auto. Ta importante pa e number di auto ta cuadra cu e persoonsnummer pa evita tardansa ora di procesa e pago. Cu e cambio aki por compronde e ora cu te awor, ningun automobilista a haya boet ainda pa incumplimento di pago. Pero despues di 15 di februari 2021, esey ta cambia. 

REGISTRA PAGO

Departamento di Impuesto ta registrando e pagonan online cu a wordo haci caba. Tin algun dia di atraso pero ta tratando pa manda e recibonan mas lihe posibel via e-mail. E contribuyentenan lo por spera un e-mail na cualkier momento. No tur contribuyente a ricibi nan recibo pero esaki lo wordo procesa sigur.