Wever na sindicatonan: Ta envolvi sindicato den reforma, caminda ta relevante

ORANJESTAD – Gabinet Wever Croes semper a y lo duna participacion na sindicatonan di Aruba. Asina gobierno a contesta un carta cu 5 sindicato a manda pa gobierno, exigiendo participacion activo den negosacion pa cu e landspakket cu tin aworaki riba mesa. Mientras cu gobierno ta sigura participacion, tin un frase si cu ta clarifica cu no den tur cos ta haya participacion. “Nos ta balora cu na cada reforma caminda esaki ta relevante, ta envolvi e gremionan en cuestion” e comunicado ta bisa, pues ‘caminda ta relevante’. No ta conoci si esaki ta suficiente pa e sindicatonan ‘keda contento y satisfecho’.

E CARTA

Manera ta conoci, sindicatonan SADA, SEPPA, SIMAR, SPA, TOPA a dirigi un carta na Gobierno den cual nan ta expresa cu nan no ta acepta cu nan no ta wordo envolvi den decisionnan grandi cu ta concerni nan miembronan y ta pidi participacion den tur loke ta trata e landspakket.

CONTESTA

Riba e carta aki Premier Evelyn Wever-Croes a contesta nan cu Gabinete Wever-Croes ta pone como prioridad transparencia y participacion. “Esaki nos a haci desde cu nos a sinta den gobierno. Y ta pa e motibo aki aña pasa nos a tene encuentronan regularmente cu tur gremio, sindical, comercial y hasta cu partidonan politico cu no ta representa den Parlamento, algo cu nunca antes a pasa na Aruba. Y ta p’esey e aña aki nos a continua cu e encuentronan aki den luna di januari.

DIALOGO TA PAS PERO MESTER TA RELEVANTE

E peticion di sindicatonan pa participacion y dialogo durante e fase di preparacion, ta pas perfectamente den e vision di nos gabinete, y p’esey semper a wordo honra. Nos ta balora cu na cada reforma caminda esaki ta relevante, ta envolvi e gremionan en cuestion. Pues atrobe, ‘caminda esaki ta relevante’, pues no ta haya un carte blanche pa sinta negosha tur cos. 

PUNTONAN DI AGENDA

Algun di e puntonan di e agenda di reforma ta concerni e sindicatonan directamente, y ya caba, den e planificacion, a tene cuenta cu e participacion aki. “Mi a informa sindicatonan di esaki caba dia di e encuentro virtual dia 29 januari 2021. Nos kier envolvi e sindicatonan pa haya nan input, pa haya nan ideanan y pa crea sosten pa e solucionnan cu lo wordo proponi. Pa e motibo aki Gabinete Wever-Croes lo evalua na cada punto di reforma, cual gremionan mester wordo envolvi y con y ki momento”, premier Evelyn Wever-Croes a bisa.

CONTEXTO

Pa loke ta e contexto di e landspakket mes, Premier Evelyn Wever-Croes a indica cu siman pasa esaki a wordo ampliamente splica den Parlamento y den prensa, pero si sindicatonan ainda kier mas informacion, por laga sa y lo organisa un sesion pa splica mas detaya.

MESTER REFORMA

Premier Evelyn Wever-Croes a finalisa su carta recordando sindicatonan cu Aruba ta traspasando e peor crisis den nos historia. Nos pais mester awor di nos tur, pa sali padilanti. Pa nos ta exitoso den esaki, hopi cos mester cambia, mester reforma. 

PARTICIPA COMO UN PARTNER

“Mi ta expresa mi deseo un biaha mas cu sindicatonan por participa den e proceso aki como un partner den cooperacion pa yuda nos pensa cual ta e miho solucionnan pa Aruba”, Premier Wever-Croes a enfatisa na final di su carta.