Hulanda: Eind examens escolar ta sigui normal e aña aki

AMSTERDAM – E asina yama centraal examen (examen central escolar) ta sigui normal e aña aki. Asina prensa Hulandes ta cita diahuebs. Debi na e pandemia actual, tin algun medida cu ta bay facilita e trabou di e candidatonan di examen, aunke e medidanan no ta completamente concretisa. Por pensa entre otro riba duna      e alumno e chens pa permiti un extra cifra ‘malo’, osea un onvoldoende. Tambe lo ‘plama’ e examen mas ainda, pues pa e periodo di examen dura mas largo. Diabierna minister di enseñansa Slob lo duna e detayenan durante un conferencia di prensa. Tambe e candidatonan di eind examen por bay scol normal durante lockdown, y ta haya extra chens pa haci e examen di nobo si nan faya den prome instante. Normalmente e examenan aki tambe ta conta pa Aruba y otro islanan di Caribe Hulandes.