Barconan crucero ‘bashi’ staciona na waf toch ta genera entrada!

ORANJESTAD – Por mira varios barco crucero staciona continuamente na waf di Aruba. Esaki no obstante e hecho cu no tin turismo crucero debi na e pandemia. Y toch e ta genera entrada pa Aruba. Asina oficina di turismo ta informa den un comunicado. Segun e oficina, e industria di crucero a paralisa desde inicio di e pandemia y ainda no tin fecha concreto riba re-inicio di operacion den e region di Caribe. E industria ta pendiente pa CDC (Centers for Disease Control and Prevention) aproba e recomendacionnan di e protocolnan relaciona cu COVID-19 pa barconan di crucero. E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.