Caso di SIWA contra WEB ta sigui awe y director ta para retencion di salario

ORANJESTAD – E caso sumario cu sindicato cu ta representa trahadonan di WEB (SIWA) a entama y cu mester a tuma lugar awe diahuebs mainta, ta tuma lugar ainda pero den ora di (awe) atardi. Asina e portal aki a compronde di e declaracion di e mesun sindicato un dia prome na un emisora local. Lo a wanta e caso ora cu gerencia dos dia pasa a anuncia pae sinta na mesa cu  sindicato pa negosha e situacion di salario ‘adapta’. E carta a anuncia cu ta suspende retencion di salario conforme e peticion di Hulanda (di 12.6% di salario di tur trahado) relaciona cu COVID19, te ora cu yega na otro palabracion.

PROTESTA 

Na final di aña pasa, varios gremio (entre nan SIWA) a cuminsa mustra desaprobacion pa cu e continuacion di retencion di salario den tempo di crisis. E pensamento cu e retencion di salario mester sigui ‘te proximo aviso’ (tot nadere order), esta sigui den 2021, no tabata aceptabel pa e sindicato(nan). Y nan a vocifera esaki tambe. Ora cu aña a bolter y cu e propio secretario di estado Hulandes Knops na Aruba a bisa cu e medidanan ta continua (entre nan e retencion di salario cu gobierno di Aruba a implementa cu e cumplimento den direccion di Hulanda),  pero ta keda na Aruba con ta haci esaki, e gremionan no a gusta esaki. 

CORTEE sindicato SIWA a bay asina leu pa entama un caso contra nan doño di trabou (WEB) cu intencion pa pidi huez para e retencion di salario. E caso lo mester a tuma lugar diahuebs mainta (awe) pero a compronde cu esaki lo a wordo wanta, despues di e carta di e director di WEB, Luis Oduber. A palabra cu lo wanta e caso te otro siman, pero awor ta resulta cu e caso lo tuma lugar diahuebs merdia mes (3’or) pa asina SIWA haya sa kico legalmente ta bira e decision. Por lesa e carta di e director di WEB AKI.