Crisis Team analisando aumento di morto di Covid19

ORANJESTAD – Crisis Team di Aruba relaciona cu Covid19 ‘ta analisando e tendencia di e pandemia y e aumento di casonan di fayecimento’ (pa Covid19).Asina e boletin di e ekipo a bisa diaranson. Manera raporta diaranson caba, Aruba a conoce su di 6 morto den apenas 3 dia di tempo pa Covid19. Y esaki tabata motibo di preocupacion tambe pa Crisis Team. Dialuna tabatin 2 morto, diamars y diaranson tambe 2 cada uno. 

MAS MORTO FRECUENTE

No ta prome biaha cu tabatin 2 morto riba un dia, ya cu ultimo biaha cu esaki a sosode, tabata aña pasa, pero no tras di otro sino despues di algun dia/siman, cu tabatin 2 morto. Tambe e aña aki tabatin 4 morto pero di un total di varios dia. Por corda con tambe October aña pasa, tabatin un dia cu tabatin 3 morto anuncia riba un dia. Pero atrobe, esaki no kier men cu tur tres tabata den e ultimo 24 ora di e dia ey, sino acumula y cu a keda solamente anuncia pareu. Asina mes, e desaroyo di 6 morto den 3 dia, ta zona alarmante. 

MORTO TA DI COVID BERDAD?

Tambe tabatin e discussion (cu ainda ta valido) si enberdad tur e mortonan cu ta keda raporta di Covid19, ta asina, of si cu e persona a muri di otro cos y ta ‘label’ e como morto di Covid19, ‘solamente’ pasobra e tabata contagia cu e virus na momento di e morto. Ora cu e asociacion di specialista VMSA a bin dilanti aña pasa cu e critica, mesora Crisis Team a bin dilanti pa sigura cu tur cos anuncia, ‘ta corecto’. Segun nan declaracion (Crisis Team) e tempo ey, e protocol cu Aruba ta(bata) usando pa registra mortonan relaciona cu COVID-19, ta(bata) sigura cu e cantidad di morto cu tin na Aruba pa e virus, ta(bata) corecto. Esey mester a compronde e tempo ey di e hefe di Dienst Besmettelijke Ziektes (DBZ) di Departamento di salud (DVG) Sharline Koolman-Wever.  Segun Koolman su contesta na noticiacla.com e tempo ey, tur medico na Aruba debidamente a ricibi un protocol con pa yena un acta di fayecimento durante pandemia di COVID-19. Pues cu esey mester compronde cu nan ta haci nan trabou segun e protocol ,y como tal mester sali di e punto di salida cu e cantidad di mortonan registra pa COVID, ta corecto. 

CUESTIONA PA VMSA 

E tema pues a bin a raiz di e cuestionamento di asociacion di specialistanan di Aruba (VMSA) e tempo ey riba e cantidad real di morto a consecuencia di COVID-19. Manera cu e portal aki a raporta recientemente, segun un raport cu VSMA a traha riba e tema di COVID-19, nan ta splica cu nan tin duda cu si enberdad tur 3 morto ta relaciona cu e virus. Sigur e prome dosnan nan ta cuestiona. Pero manera cu Koolman a contesta e pregunta di e portal aki dialuna anochi durante e briefing di coronavirus COVID-19, basa riba e protocol usa, no mester tin duda riba e cantidad di morto, y cu como tal e cifra ta corecto. 

PROTOCOL TA FUNCIONA

Koolman a splica mas aleu, cu personanan cu a wordo diagnostic cu COVID-19 y a fayece, ta wordo registra como morto a consecuencia di COVID-19. “E virus ta ocasiona e causa di morto” Koolman a sigui splica. “E causa direct ta otro. Por ehempel, e por muri di un trombolismo, causa pa COVID. Pesey e morto ta wordo registra asina” Koolman a continua bisando. Segun Koolman, e pensamento tras di esaki ta,cu si e victimanan no a haya COVID-19, nan lo no a muri. “Mediconan na Aruba a haya instruccion. Nan a haya un protocol, con pa yena e causa di morto durante e pandemia aki. Unabez cu e causa di morto wordo yena, segun un acta di fayecimento, e ta bay censo, y censo  ta mande pa departamento di salud publico y eynan ta haya e data. E personal cu ta entrena pa PAHO, ta selecta y yena e causanan di morto”. Koolman a sigui splica e tempo ey.