Pa di tres dia sigui tin hende ta muri di Covid19 na Aruba!

ORANJESTAD -  Segun resumen di awe atrobe 2 persona a fayece di Covid19.  Esaki ta bira e di tres dia sigui cu tin hende ta muri di Covid19 na Aruba, y tur e tres dianan aki ta 2 hende cada dia, for di dialuna. A registra un total di 32 caso nobo di Covid-19, di cual 4 ta no-residente. E cifra di no-residente positivo ta ensera esnan no-residente cu ta test na aeropuerto na nan yegada y na laboratorionan prome cu nan bandona Aruba.  E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 481 test. 'Postivity rate' entre nos residentenan ta 15% y 20 persona a recupera.

ACTIVO

Activo tin awe 329 caso, cantidad di fayecido relaciona cu Covid-19 a aumenta na 68. Palabra di forsa na famia di e fayecidonan. Crisis Team ta analisando e tendencia di e pandemia y e aumento di casonan di fayecimento. 

HOSPITAL

Hospital ta informa cu tin un total di 16 persona interna di cual 5 ta den Cuido Intensivo y 11 riba unidad general di covid. Edad promedio di esnan ingresa pa extra cuido ta 63 aña.