Minister: Ta lamenta accion di algun empleado di DIP awe mainta

ORANJESTAD – “Mi ta lamenta e accion di algun empleado di DIP coordina pa Seppa, pa bolbe pone trabou abou.” Tabata e prome reaccion awe mainta pa noticiacla di minister encarga cu infrastructura Evelyn Wever Croes, riba e accion awe mainta. E trahadonan a pone trabou abou un biaha mas debi cu nan no ta hayando atencion di e mandatario, particularmente un carta pa reunion cual fecha a vence ayera merdia. Y falta di reaccion a pone e trahadonan pone trabou abou. Nan problema ta e actitud di e director, y e falta di e minister encarga pa actua. “Mi a splica nan kiko nan mester hasi pa mi yuda nan, lamentablemente nan ta insisti di pone trabou abou y perhudica miles di persona cu ta wardando añanan pa haya tereno” e mandatario a sigui bisa.

DIFERENCIA DI OPINION

Segun e mandatario, cualquier diferencia di opinion, ta na mesa bo mester ta pa soluciona nan. Nan diferencia di opinion ta cu e director y ta na mesa cu e director nan mester cuminsa pa atende e problemanan. “ Si en caso nan no sali afo, mi ta pone un comision disponible pa sigi atende cu nan pa soluciona e problema. E disponibilidad ey tey ainda, pesey mi no ta compronde e posicion di e sindicato. Mi ta urgi esnan envolvi pa aplica sano huicio. Sinta na mesa pa yega na otro y si no yega na otro, nos ta escala e problema y mi tin un equipo pa atende nan mesora” e mandatario a sigui bisa. 

URGI EMPLEADONAN

Segun sra Wever, Aruba ta atravesando momentonan hopi duro. “Mi ta urgi e empleadonan pa no sigi perhudica miles di cuidadanonan cu nan accion. Miles di hende ta warda un tereno pa construi cas, pa planta. Nan tin hopi aña ta warda. Ban yuda nan mientras na mesa ta busca un solucion” e mandatario a finalisa bisando.