Sindicatonan kier participacion activo cu agenda Landspakket

ORANJESTAD – Un total di 5 sindicato kier participacion activo den tur aspecto di deliberacion y ehecucion di e agenda di ehecucion di e Landspakket pa Aruba cu a keda firma recientemente. Ta trata di e sindicatonan SADA, SPA, SEPPA, TOPA y SIMAR. 

REACCION PROME MINISTER

Por a compronde di prome minister recientemente caba, basa riba un caso similar, pero den e caso aki di gremionan comercial cu tambe tabata kier un participacion mas activo, cu si kier participacion activo den negosacion, mester ‘forma un partido politico, bay eleccion y gana asiento’ pa esey sosode. Cu esaki e mandatario a indica cu tin limitacion te na unda por bay cu participacion activo.

REPRESENTACION

Segun e sindicatonan, nan ta sinti cu pa por representa nan miembronan na ‘un manera digno y cumpli cu nos tarea y meta principal’, nan participacion directo ta necesario. “Nos no ta acepta cu nos ta haya invitacion pa reunion ora cu tur puntonan importante ya a keda determina y finalisa y pa haya despues sorpresa desagradabel” e sindicatonan ta sigui bisa den nan carta. “Nos kier haya espacio pa por reuni cu nos miembronan cual ta e rumbo cu ta scoge y cu nan por duna nan opinion y ideanan”, e carta ta sigui bisa. 

INTENCION

Segun e sindicatonan, si e intencion ta pa bin cu desaroyo cu ta trece consecuencia cu ta afecta mayoria di e miembronan na un manera no desea y aceptabel, nan (e sindicatonan) lo no por para pa confrontacionan cu esaki ta trece cu nan. A pidi como tal pa haya un invitacion pa un reunion pa como sindicato na forma habri, por trece nan puntonan padilanti. Por lesa e carta completo AKI.