Gobernador : Rapport preliminar CFT cla dialuna!

ORANJESTAD - Gabinete di gobernador di Aruba a confirma e noticia di NoticiaCla, cu dialuna awor e rapport preliminar di CFT ta wordo entrega na su persona. Algun ora despues cu NoticiaCla a presenta e noticia, e confirmacion a drenta.  Segun e relato oficial di Gabinete di Gobernador, dia 11 di juli 2014 Conseho di Minister di Reino a tuma un decision cu Gobernador di Aruba mester ehecuta. A base di e decision aki, Gobernador di Aruba lo inicia un investigacion riba e realidad di e calculacionan den e presupuesto 2014. Lo dura algun tempo prome cu e investigacion aki lo por wordo conclui. "Na es momentonan aki, Gobernador ta hopi preocupa pa e situacion di pais cu no por y no mag continua" e relato ta sigui bisa. 

Den interes di Aruba y su poblacion Gobernador a empenja su mes pa hasi e proceso di investigacion mas cortico. Ta conoci cerca Gobernador cu e ministernan a para firme pa yega na un solucion. Pa es motibo aki un reporte preliminar lo ta cla riba dialuna 21 di juli y esaki lo ser entrega na Gobernador. Basa riba e reporte preliminar Gobernador di Aruba lo duna claridad riba e mesun dia tocante e firmamento di e presupuesto di pais Aruba pa aña 2014 segun e orden huridico vigente den Reino Hulandes.