Partido politico MEP ta cumpli 50 aña di existencia awe

ORANJESTAD - Awe partido politico Movimento Electoral di Pueblo (MEP) ta cumpliendo 50 aña di existencia. E fundador di e partido e tempo ey Gilberto Francois ‘Betico’ Croes a lidera e partido te na su morto na 1986, sigui pa Nelson Oduber cu a gara e timon y sigui te 2011, pasando e batuta pa actual lider di e partido Evelyn Wever Croes. Tres luna despues cu partido MEP a ser funda dia 9 februari 1971, MEP a obtene 7 asiento (8.099 voto) den e eleccion pa Eilandsraad, pues MEP a logra un tercer parti di e electorado Arubano. Y desde e aña ey te cu awe e partido  no a yega di baha bao di 7 asiento den e eleccionnan na Aruba.   

PARTIDO MAS GRANDI

Na 1975 MEP a bira e partido politico mas grandi na Aruba. Desde 1977, a pone presion riba Hulanda mirando cu segun referendum, 60% di e pueblo a desea independencia. A dicidi durante e Ronde Tafel Conferentie di 1983 cu 1 di januari 1986 Aruba lo a ricibi su Status Aparte, y pa 18 di maart 1996, Aruba lo a ricibi su independencia. MEP na eleccion di 1985 a keda e partido mas grandi cu 8 asiento, pero no a forma gobierno ya cu oposicion a forma esaki den un coalicion.

HISTORIA DI MEP DEN PARLAMENTO 

Despues cu Betico Croes a fayece a consecuencia di un accidente di auto na 1986, a eligi Nelson Oduber como e lider di e partido. Sr Oduber a keda escohi 4 biaha como prome minister di Aruba. Den Parlamento, MEP tabatin mayoria absoluto di asiento (12) entre October 2001-2005, cual el a mantene den e periodo October 2005-2009, cu 11 di e 21 asiento disponible. Den ambos periodo, MEP tabata e unico partido na mando den gabinete Oduber III y IV. Na 2009 MEP a perde su mayoria y a sinta di 2009-2017 den oposicion. Na eleccion di 2017, MEP a logra 9 asiento y a forma e coalicion cu partidonan POR y RED. For di 2017, MEP a produci e prome prome minister femenino di Aruba, den persona di e actual lider di partido Evelyn Wever Croes.