- Kes the Band di Trinidad confirma pa Flip Flop Festival na juni!
- DVG: A cuminsa hospitalisa hende localmente infecta cu Dengue
- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
Ex director Davelaar a perde su caso contra Serlimar
ORANJESTAD – Ex director di Serlimar Henley Davelaar a perde su caso contra Serlimar Sui Generis. Esaki kier men cu Davelaar no ta haya e suma di 780.450 florin cu el a pidi pa Serlimar pag’e como ‘recompensa’. Ademas Corte no a bay di acuerdo cu ponencia di Davelaar cu Serlimar a actua incorecto contra Davelaar pa cu su retiro na februari di aña pasa.
E CASO
Tabata na augustus di aña pasa (2020) cu Davelaar (representa pa abogado Chris Lejuez) a hiba Serlimar Corte, pa bringa su retiro y wak si e por haya un compensacion pa e retiro cu el a haya na februari di e aña ey (2020). Den e caso, Davelaar a alega entre otro cu Serlimar a comete ‘wanprestatie;’. Serlimar di su banda, representa pa abogado David Kock di DKLegal, a desbarata e ponencia ey y ademas a indica cu Davelaar no a cumpli cu e trabou pa cual e la keda emplea. E mester a remedia e situacion di cobransa di cliente, mehora e servicio di recibo na cliente, y presenta un business plan. Cos cu nunca e no a logra haci of presenta na Conseho di Supervicion (RvT) di Serlimar. Ademas, e mester a percura pa mensualmente e suma di 525 mil florin keda colecta na sushi residencial. Nada di esey no a tuma lugar. Y como tal RvT a determina cu Davelaar ‘No tin e cualidad pa maneha’ e compania. A duna Davelaar te hasta un warning. Dado caso cos a bira dje problematico cu a dicidi di termina e relacion di trabou cu Davelaar na februari di 2020. Cos cu Davelaar a debati, indicando cu mester a cumpli cu e un luna opzeggings termijn. Como ‘recompensa’ di su retiro, Davelaar a exigi e suma di 780.450 florin pa Serlimar pag’e, cu ta ekivalente na 3 aña di salario cu ta e resto cu e tabata falta di su contracto di 5 aña (el a traha 2 aña for di October 2018 te februari 2020). Huez a rechasa esaki y a dicta fayo pa Davelaar den e caso aki. Por lesa e sentencia completo AKI.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
