“Shoco Polis” a huramenta durante open dag di Cuerpo Policial

ORANJESTAD: - Cuerpo Policial Arubano a organisa -, pa di 4 aña consecutivo-, nan open dag na academia policial E.J. (Watty) Vos riba ‘Dia di Betico’. Esaki a sosode den presencia di minister di husticia Arthur Dowers. Durante e actividad a presenta e mascota nobo di Cuerpo Policial Arubano “Shoco Polis ” na e publico presente cu despues a presta huramentacion dilanti minister Dowers. Shoco Polis lo bai ta presente hunto cu Cuerpo Policial na actividadnan, pa e educa y motiva hobennan pa no solamente bira polis, pero tambe pa haya respet y comprension pa trabou di polis. E evento ultimo tempo a bira uno cu ta hala hopi atencion serca comunidad, cu ta haya un oportunidad pa mira e trabounan cu ta wordo haci diariamente pa cuerpo policial, e complicacionnan cu bo ta wordo confronta cune haciendo e trabou aki y e rason pakico cierto instrumento y medionan ta wordo uza.