BCA: Segun encuesta, percepcion ta cu corupcion ta comun y creciente

ORANJESTAD -  Segun resultado di e ‘Encuesta di Corupcion 2020’, percepcion ta cu corupcion ta comun y creciente . Asina Banco Central di Aruba (BCA) ta mustra den un comunicado dialuna. BCA awe ta publica su rapport Report Corruption Survey (RCS) 2020. E resultadonan di e encuesta aki ta mustra cu un mayoria grandi di personanan encuesta, cual a alcansa 94 porciento na 2020 for di 81 porciento na 2019 y 76 porciento na 2018, tabata di opinion cu e problema di corupcion tabata comun y creciente. Positivo ta cu un averahe di 95 porciento di personanan encuesta a bisa cu varios actonan coruptivo ta inaceptabel. 

Casi mita di personanan encuesta ta pensa cu e mas efectivo cu un hende comun por haci pa combati corupcion ta door di raporta corupcion, mientras cu personanan encuesta a menciona cu e introduccion di un maneho pa denuncia iregularidadnan den e sector publico ta e medida principal cu gobierno por tuma pa combati corupcion. Ta percibi cu Ministerio Publico y Bureau Integridad Aruba ta e dos organisacionan principal cu mester lidera e lucha contra corupcion.

E RCS 2020, cual ta disponibel riba e website di BCA, ta presenta e resultadonan mas importante di e encuesta di corupcion ehecuta na 2020. E ta enfoca riba e percepcion di residentenan riba e nivel di corupcion, nan experiencia cu corupcion ora di usa servicionan particularmente den sector publico, y e necesidad pa medidanan adicional pa combati corupcion.

Frena corupcion ta un prioridad halto pa BCA, pasobra corupcion tin consecuencianan negativo economico y social cu por impedi BCA di cumpli cu su mision. Diferente oganisacionnan internacional, manera Tranparency International, ta ehecuta encuestanan riba e nivel di corupcion na diferente pais. Como cu Aruba no ta forma parti di e encuestanan internacional aki y pa cu e motibo ey data importante di corupcion no ta diponibel, BCA ta conduci e encuesta di corupcion desde 2018.

E rapport CORRUPTION SURVEY 2020 ta disponibel riba e website di BCA https://www.cbaruba.org/cba/manageDocument.do?dispatch=view&id=5620. Por haya resultadonan di encuestanan anterior di corupcion aki tambe. 

 .