Herrick Henriquez a bira director nobo di ATIA

ORANJESTAD - Aruba Trade and Industry Association (ATIA) a presenta su director nobo, den persona di Señor Herrick E. Henriquez dialuna pa medio di un comunicado. Señor Henriquez lo drenta den su funcion como director entrante 1 di maart 2021.

Como Director, Herrick lo pone tur su conocemento y experticio na disposicion y interes di nos miembronan y tambe comercio di Aruba en general.

Herrick, lo consolida y sigui construi ariba ATIA su trayectoria solido pa salvaguardia interes di comercio di Aruba, desaroyando lazonan estrecho cu commerciantenan, empresanan y cu Gobierno di Aruba.

Segun e comunicado, Herrick, ta bon conoci den nos comunidad pa ta envolvi den organisa diferente evento exitosamente, cual hunto cu su trayectoria professional y experticio a jude crea un network empresarial y social remarcabel tanto local  y international. 

Prome cu Herrick a join ATIA, Herrick a ocupa e funcion di Senior Examiner Prudential Supervision na Banco Central di Aruba pa 7 aña, anteriormente e a ocupa e posicion di Assistant Manager Assurance, na un di e companianan renombra di accounting na Aruba.  

Hunta di supervision di ATIA ta contento pa apunta Herrick como ATIA su director nobo, y tin tur e confiansa cu Herrick su experiencia conhuntamente cu su abilidad pa identifica oportunidad y conocemento di comercio lo sigui fortalese y diversifica ATIA y asina logra un futuro exitante den e normal nobo.