Minister na SPA: Informa bo mes miho prome cu saca conclusion robez

ORANJESTAD – Minister di finanza Xiomara Maduro a manda mensahe pa presidente di sindicato SPA Jose Dirkz riba e voice note cu a plama e dianan aki. E contenido tabata riba e situacion di e contenido di e landspakket. Segun e mandatario, el a a scucha Sindicato SPA trece su splicacion y preocupacion dilanti caminda cu unda segun e mandatario, Sr. Dirks ta bisa cu el a lesa e Landspakket y cu eyden ta poni cu BBO ta bira dobbel y cu ta bay dollarisa na Aruba. 

NO TA BERDAD

Minister Maduro ta reacciona cu e informacion treci aki no ta cuadra cu realidad. Segun e mandatario, ningun caminda ta poni cu BBO lo redobla ademas un BTW no ta un BBO cual ta dos impuesto full diferente. “Ningun caminda ta poni cu lo bay introduci dollar na Aruba, otro informacion cu no ta berdad. E realidad ta cu ta bay haci un investigacion y esaki ta wordo haci despues di aña 2022” e mandatario a sigui bisa.

NO CORECTO Y RESPONSABEL

Ademas, Minister Xiomara Maduro ta trece dilanti cu no ta corecto y tampoco responsabel pa un lider sindical meymey di un pandemia bay crea panico innecesario den Pueblo treciendo informacion cu no ta berdad. “Ta miho pa laga esnan responsabel pa trata cu e Landspakket aki duna informacion prome cu core saca conclusion sin ta sikiera bon informa” e mandatario a sigui bisa.