KvK: Contento cu e derecho di pidi retiro ta wordo reconoci

ORANJESTAD – Camara di Comercio (KvK) a raporta diabierna den un comunicado cu nan ta contento cu awor si e derecho di pidi retiro ta wordo reconoci. Nan ta referi na e caso cu e compania Romar Trading a gana e siman aki cu ta exigi pa Departamento di Labor y Organisacion (DAO) acepta peticionan di retiro di trahadonan di compania. Segun e gremio comercial, ta na varios ocacion, incluyendo via comunicadonan di prensa,  KvK a vocifera e situacion dificil cu hopi empresa ta pasando aden pa hopi luna caba. E hecho cu actividad comercial en general te ainda no ta suficiente y cu mester economisa riba tur tereno, ta pone un peso adicional riba e companianan. Hopi negoshi ta operando pa varios luna caba cu reduccion y/of adaptacion di e orario di trabao di su empleadonan pa por logra sobrevivi, pero e situacion aki no ta sostenibel pa mas tempo. 

APELACION

Pa e motibo ey KvK a haci diferente apelacion por escrito na Minister di Labor pa urgi DAO pa acepta e peticionnan di retiro y tambe pa e Comision di Retiro reanuda su actividadnan y consecuentemente por tuma decision. KvK a indica cu e derecho aki ta un derecho fundamental cu ta hancra den nos constitucion y ta duna tur ciudadano e posibilidad di wordo scucha. Segun stipulacion den e ley “Landsverordening Beëindiging Arbeidsovereenkomsten”, un compania por opta pa entrega un peticion di retiro di personal cerca e Director di Departamento di Labor (DAO) y e peticionnan aki ta wordo trata door di e Comision di Retiro (Ontslagcommissie). Sinembargo, desde maart 2020 DAO no ta aceptando e peticionnan di retiro y e Ontslagcommissie no ta reuniendo tampoco, locual ta en pugna cu e ley y ta viola e derecho di e companianan pa por haci uzo di e intermediacion aki.  KvK ta contento cu Corte di Husticia, por medio di un sentencia di hues, a ratifica cu DAO ta violando e ley constitutonal door di nenga di acepta peticion di retiro, kitando e derecho fundamental di nos empresarionan. 

RESTRUCTURACION DI GASTO

Segun e gremio, ta importante pa realisa cu ta necesario y cardinal pa un compania tin e posibilidad di haci un restructuracion di su gastonan y actividadnan pa por tin continuacion di e negoshi na momento cu ingreso reduci significantemente. Durante di e proceso aki ta esencial pa por haci uso di tur opcion existente segun e necesidad di e negoshi. E meta principal ta pa evita cu e companianan ta wordo forsa pa bay over na cera e negoshi, ya cu por medio di un restructuracion por mantene un grupo di empleado na trabao en bes cu tur empleado keda sin trabao ora cera e negoshi. 

DIALOGO 

KvK ta señala cu ta hopi importante pa por tin dialogo entre sector priva y gobierno riba diferente puntonan di preocupacion relaciona cu distanciamento digital y cambionan continuo cu comercio tin cu enfrenta pa garantisa siguridad di e empleado y cliente y na mesun momento sigui relevante den mercado.