Minister ta sigura cu e no ta esun cu ta bay kita e dialuna liber despues di carnaval

ORANJESTAD – ‘Mi no ta e minister di Labor cu ta bay kita e dialuna di descanso ey’. Asina minister di Labor sr Glenbert Croes a contesta noticiacla diahuebs mainta durante un conferencia di prensa, refiriendo na e decision controversial pa laga e dialuna despues di carnaval liber, aunke cu no tin parada (e diadomingo prome). Ley manera cu e ta traha aworaki, ta permiti un dia liber, contal cu e dia prome tin un parada di carnaval. E minister a dicidi cu e dialuna ta keda liber, aunke cu no tin parada. Y e tabata basta expresivo pa cu su motibo.

E TA KEDA LIBER

Mientras cu e portal aki como prome frase di e articulo aki a filtra mas bien loke minister Croes a bisa, mester aclaria pa buena marcha, cu su declaracion completo, tabata mas largo aun. Su declaracion completo tabata: “Ami no ta e minister di Labor, representando mi partido MEP, e gobierno cu mi ta representa, e coalicion cu mi ta representa. A nos no ta e gobierno cu ta bay kita e dialuna di carnaval di descanso ey for di e comunidad aki”. E mandatario su argumento ta cu tur aña e dia liber aki a wordo honra, tur aña e la wordo paga tambe. E mandatario ta basa su mes tambe riba e hecho cu nos comunidad a sufri suficiente, y cu nan merece e dia liber aki. 

FORMULACION 

E mandatario a toca tambe e parti di e formulacion di e texto di e ley, y ta considera e formulacion di e ley como ‘desafortuna’. “Pasobra e dialuna liber despues di carnaval pa nos ta manera cu nos ta interprete, -esey ta e instruccion tambe cu nos ta manda DAO-, nos a aprobe, mi a mande ministerraad, no solamente cu mi a tuma e decision. Ma bay conseho di minister cu ne. Ma bay aworaki DWJZ (Directie Wetgeving Juridische Zaken) ter uitvoering, vooruitlopend riba e cambio (di ley)” e mandatario a sigui bisa. Esaki pasobra segun e mandatario, e intencion ta cu ta bay clarifica e ley aki. “E dialuna despues di carnaval, irrespecto cu si tin un parada of no, ta e cierre di un temporada y un comienso di un temporada religioso. Por lo cual e dialuna prome cu diaranson di shinishi, na nos parecer, mester ta liber” e mandatario a bisa finalmente. E kier pa pueblo usa e dialuna liber como parti di un fin di siman largo, pa reflecciona hunto y celebra esaki.