Un grupo di werkster di SKOA a bay den accion y protesta cerca minister

ORANJESTAD – Un grupo di ‘werkster’ cu ta traha pa Stichting Katholiek Onderwijs Aruba (SKOA) a bay den accion y a acudi cerca minister di Labor Glenbert Croes diahuebs mainta pa proteccion di nan trabou. Manera ta conoci, un grupo di 90 werkster nan trabou ta na peliger debi cu tin problema pa paga nan. E forma con ta andando cu e situacion a pone cu SKOA posiblemente no por sigui mantene e werksternan na trabou, debi cu nan mes no ta ricibiendo fondonan necesario pa cubri gasto di e werksternan. SKOA ta den corte cu gobierno pa ricibi e pagonan pendiente, y mientrastanto e werksternan tin miedo cu nan ta keda sin pago y mas pio, sin trabou. Minister di Labor a priminti di haci lo possible pa resolve e problema y ta culpa e gobierno anterior di a causa e situacion actual.