Richard van Zwol bek na Aruba pa reunionnan riba e.o. presupuesto

ORANJESTAD – E super ambtenaar di Hulanda Richard van Zwol ta bek na Aruba pa reuni cu gobierno atrobe. Fuentenan di NoticiaCla.com a confirma su yegada, y cu e ta akinan pa motibonan specifico. E la yega Aruba diadomingo y lo keda pa un par di dia, durante cual e lo reuni cu varios dignatario y instancianan pa pone su mes na altura riba e situacion actual di e.o. e presupuesto. Unabez cu e termina su bishita relampago, e ta bolbe Hulanda pa duna nan un 'update real' di e situacion actual rond di e temanan discuti. 

Ultimo biaha cu e tabata na Aruba, cos no a bay mucho bon, unda cu e la te hasta opta pa cancela tur reunion cu fraccionnan politico di nos isla. No ta conoci e biaha aki si e lo topa cu e fraccionnan e biaha aki. Ta conoci cu tanto prome minister Eman como vice prome minister Mike de Meza ta den exterior, y como tal nan lo no topa cune. Den e caso aki, ta keda Benny Sevinger aunke cu tin informacion cu e lo papia mas sigur cu cierto departamentonan y tambe minister di finanza Angel Bermudez.

Bermudez a confirma na NoticiaCla.com siman pasa cu e siman aki probablemente lo por keda cla cu e concepto di presupuesto 2015, pa despues entrege atrobe na gobernador pa e por cuminsa cana su caminda. Problema segun Bermudez, ta cu tin hopi minister den exterior y mester a haya nan pa firma e presupuesto. Siman pasa tabatin como 4 afo segun e mandatario, y ayera otro 2 a biaha atrobe. Mientrastanto e otronan a bolbe Aruba.

Pa loke ta van Zwol, tin disputa riba su ‘importancia’ den gobierno Hulandes y si enberdad e ta un ‘super ambtenaar’. Algun a indica cu e ta un ‘simpel’ ambtenaar aunke cu e funcion di ambtenaar mas halto den rango. NoticiaCla.com a confirma cu den practica, van Zwol tin te hasta ‘mas poder’ cu su hefe, Ronald Plasterk y cu e tin un ‘liña directo’ cu prome minister Mark Rutte. Pues ora cu van Zwol papia, hende ta scucha y cosnan ta sosode, mas liher cu ora cu ta trata Plasterk. Esey ta pone cu cada bez cu e ta na Aruba, cosnan ta sosode riba e tereno politico cu ta hala atencion.